Արտահերթը չի քննարկվելու

Արդյո՞ք իշխանություն-ՀԱԿ մոտալուտ երկխոսության համար ՀՀԿ-ն արդեն կազմել է իր օրակարգը, եւ ի՞նչ հարցեր են դրանում ընդգրկվել: Այս հարցի վերաբերյալ ԱԺ ՀՀԿ խմբակցության պատգամավոր Հովհաննես Սահակյանի պատասխանը «Երկիր»-ին հետեւյալն էր.

«ՀՀԿ-ի օրակարգն ամբողջ երկրի, պետության առջեւ ծառացած խնդիրներն են` քաղաքականից մինչեւ տնտեսական: Մենք ասել ենք, որ արտահերթ ընտրությունները քննարկման առարկա չեն կարող լինել: Դրանք ամենօրյա ընթացող պրոցեսներ չեն, որ առավոտյան արթնանան ու արտահերթ ընտրություն պահանջեն»:

Հ. Սահակյանը հավելեց, որ արտահերթ ընտրություններն առաջին հերթին վնասակար կարող են լինել, քանի որ դրանք ենթադրում են հապճեպ նախապատրաստվել, ինչն ավելի աղավաղված ընտրություններ ունենալու նախադրյալ կարող է լինել:

Երկրորդ` արտահերթ ընտրություններ անցկացնելու համար հիմքեր չկան. երկիրը քաղաքական ճգնաժամի մեջ չէ, չկան ո'չ արտաքին, ո'չ ներքին մարտահրավերներ:

Իսկ եթե, արտահերթ ընտրություններ անցկացնելուց բացի, կան այլ առաջարկներ, ընդդիմությունը թող դիմի իշխանություններին: Ինչպես նշեց Հ. Սահակյանը, իրենք պատրաստ են լսել, քննարկել այդ հարցերը եւ կփորձեն գտնել լուծումներ: