Առաջիկայում հայ-իրանական ծրագրերն ունենալու են մեծ ձեռքբերումներ. վստահ է վարչապետը

Վարչապետ Հովիկ Աբրահամյանն ընդունել է Հայաստանում Իրանի արտակարգ և լիազոր դեսպան Մոհամմադ Ռեյիսիին: Վարչապետը կարևորել է հարևան Իրանի հետ հարաբերությունների հետագա զարգացումն ու ընդլայնումը, տարբեր ոլորտներում փոխգործակցության ամրապնդումը:

«Իմ նպատակն է հետևողականորեն իրականացնել Իրանի հետ ձեռք բերված բոլոր պայմանավորվածությունները և մշակել նոր ծրագրեր: Վստահ եմ, որ առաջիկայում այս ուղղությամբ ունենալու ենք մեծ ձեռքբերումներ»,- ասել է Հովիկ Աբրահամյանը:

«Ուրախ ենք Ձեր նշանակման կապակցությամբ և վստահ, որ Իրանի ու Հայաստանի միջև հարաբերություննրում նոր զարգացում կարձանագրվի»,- դիմելով վարչապետին՝ ասել է Մոհամմադ Ռեյիսին:

Դեսպանի խոսքով՝ Իրանի իշխանությունները շահագրգռված են Հայաստանի հետ փոխգործակցության ընդլայնմամբ ու հետագա խորացմամբ:

Կառավարության կայքի տեղեկացմամբ` Հովիկ Աբրահամյանը և Մոհամմադ Ռեյիսին քննարկել են հայ-իրանական հարաբերություններին առնչվող տարբեր հարցեր: