Հոգևորական-հավատացյալ կապն ամրապնդվում է

Հայաստանյան բազմաթիվ եկեղեցիներում վերջին տարիներին ամրապնդվել են  հավատացյալների ու հոգևորականի միջև զրույցները քրիստոնեության, Աստծո, հավատքի, Աստվածաշնչի մասին: Հարկ է նշել, որ տարիներ առաջ այդ երևույթը տարածված չէր, և  Հայաստանում աղանդավորական խմբերի ակտիվացմանը զուգահեռ աճում էին քննադատությունները` ուղղված հոգևորականներին այն առումով, որ նրանք չեն շփվում եկեղեցի հաճախող հավատացյալների հետ, որ հասկանալի լեզվով չեն բացատրում, թե ինչ է քրիստոնեությունը, ինչ է հավատքը, որն է Աստծո ճշմարիտ խոսքը:

Երևանի կենտրոնում գտնվող Սուրբ Զորավոր եկեղեցում երեկոյան ժամերին կարելի է ականատես լինել հենց այդպիսի շփման հավատացյալների ու հոգևորականի միջև, երբ անկաշկանդ զրույցների միջոցով, բոլորին մատչելի ձևով հոգևորականը խոսում է այն թեմաների մասին, որոնք հուզում են քրիստոնյա հավատացյալներին: