Ֆրանսուա Օլանդը մեկ անգամ եւս ընդգծեց Մադրիդյան սկզբունքների հավասարազորությունը. դեսպան

Ֆրանսիայի Հանրապետության նախագահը չէր կարող անտեսել Արցախյան պատերազմում հակամարտող կողմերի միջեւ կնքված հրադադարի համաձայնագրի ստորագրման 20-ամյակի առիթն ու Երեւանում ԼՂ հակամարտության կարգավորման մասին չխոսել, մտքեր չփոխանակել իր հայ գործընկերների հետ. լրագրողներին այսօր ասաց ՀՀ-ում Ֆրանսիայի արտակարգ եւ լիազոր դեսպան Անրի Ռենոն:

Դեսպանը նշեց, որ մտքերի փոխանակման արդյունքում էլ արտահատվեց նաեւ այն միտքը, որ 20-ամյա հրադադարը, այդուհանդերձ, հնարավորություն չի տվել, որ պատերազմն իսպառ վերանա: Դեսպանի խոսքերով' Ֆրանսիայի նախագահն ընդգծել է, որ 20-ամյա հրադադարը հնարավորություն է, որպեսզի հետադարձ հայացք գցենք անցած 20 տարիների վրա, բայց նաեւ հնարավորություն է ԼՂ հակամարտության կարգավորման համար նոր տեսլականներ ու հեռանկարներ որոնելու փորձ անելու համար:

«Դրա համար էլ Ֆրանսիայի Հանրապետության նախագահը  կարեւորեց փոխվստահության մթնոլորտ հաստատելու անհրաժեշտությունը: Բնականաբար, նա պատրաստակամություն հայտնեց ձեռնարկել հնարավոր բոլոր միջոցները' այս տարածաշրջանում խաղաղություն, կայունություն, բարգավաճում եւ անվտանգություն վերահաստատելու համար: Նախագահը նաեւ իր տրամադրվածությունը հայտնեց օգտագործել ցանկացած հնարավոր միջոց, որի արդյունքում հնարավոր կլինի ԼՂ հակամարտության բանակցային գործընթացում  առաջխաղացում գրանցել»,- պարզաբանեց ֆրանսիացի դիվանագետը:

Ինչ վերաբերում է Ֆրանսիայի նախագահի այցի նախօրեին ԵԱՀԿ ՄԽ համանախագահների արած համատեղ հայտարարությանը, ապա դեսպանը նշեց, որ այդ հայտարարությունը լիովին համընկնում է ԼՂ հակամարտության կարգավորման հարցում Ֆրանսիայի նախագահի որդեգրած քաղաքականության ընդհանուր տրամաբանությանը: