Վարչապետը մտահոգված է քննչական կոմիտեի վարչական շենքի հիմնանորոգման ծրագրի ընդհանուր արժեքի չափից

Կառավարության կողմից այսօր հաստատված նախագծով որոշվեց, որ Երեւանի Մամիկոնյանց 46/5 հասցեում գտնվող' քննչական կոմիտեի վարչական մասնաշենքի հիմնանորոգման համար անհրաժեշտ նախագծա-նախահաշվային փաստաթղթերի հաշվարկման նպատակով 2014 թվականի բյուջեի պահուստային ֆոնդից պետք է հատկացվի 27 միլիոն 500 հազար դրամ գումար:

Հաշվի առնելով հարցի հրատապությունը` քաղաքաշինության նախարար  Նարեկ Սարգսյանը խոստացավ նաեւ գնումների ընթացակարգով նախատեսված կարգից դուրս' բանակցային եղանակով, կազմակերպել այդ նախագծա-նախահաշվային փաստաթղթերի հաշվարկումը: «Պարզապես ժամանակի խնդիրն արագ լուծելու համար»,- գնումների սահմանված ընթացակարգից դուրս գնում կազմակերպելը պարզաբանեց նա:

Վարչապետ Հովիկ Աբրահամյանը նշեց, որ հարցը վերաբերում է  քննչական կոմիտեի շենքի վերանորոգմանը, որն, իրոք, հրատապ է, դրա համար մեկ օր ժամանակ տվեց ֆինանսների եւ արդարադատության նախարարությունների հետ աշխատելու եւ հրատապ հարցի կապակցությամբ եզրակացություններն արագ ներկայացնելու համար:

Բայց Հովիկ Աբրահամյանը նաեւ մտահոգություն հայտնեց քննչական կոմիտեի վարչական մասնաշենքի հիմնանորոգման նախագծի ընդհանուր արժեքի չափի կապակցությամբ. «Գումարի չափը, պարո'ն Սարգսյան... Ես ինչ-որ տեղ նաեւ մտահոգված եմ' գումարը ոնց որ ավելի շատ է' շուրջ 1 միլիոն 800 հազար դոլարն ընդհանուր նախագծի արժեքն էր, չէ՞»,- դիմելով քաղաքաշինության նախարարին` հետաքրքրվեց նա:

Նարեկ Սարգսյանը հաստատեց վարչապետի նշած թիվը, ասաց, թե պահանջվող գումարը նախագծի ընդհանուր արժեքի 2.5 տոկոսն է, սակայն նշեց, թե, բանակցային եղանակով գնումներ կազմակերպելով, իրականում թիվը պակասելու է: