Պուտինը Ղրիմի իրադարձությունների լուսաբանման համար պարգեւատրել է 300-ից ավելի լրագրողի

Ведомости-ին հայտնի է դարձել, որ ՌԴ նախագահ Վլադիմիր Պուտինը  ռուսական ԶԼՄ-ների մի քանի հարյուր աշխատակիցների պետական մեդալներով պարգևատրելու մասին հրամանագիր է ստորագրել՝ «Ղրիմում իրադարձությունների լուսաբանման հարցում բարձր պրոֆեսիոնալության և օբյեկտիվության համար»:

Պարբերականի տվյալներով՝ հրամանագիրը ստորագրվել է դեռևս ապրիլի 22-ին, սակայն այն մինչ այժմ  նախագահի պաշտոնական կայքում չի տեղադրվել։ Այդ մասին թերթին պատմել է  փաստաթուղթը տեսած աղբյուրը: Նրա խոսքերով՝  պարգևատրվել է 300-ից ավելի մարդ, այդ թվում` 90 թղթակից: Աղբյուրը նշում է, որ պարգևատրումների մասշտաբն աննախադեպ է:

Պարգևատրվածներից մոտ 100-ը ներկայացնում են Համառուսաստանյան պետական հեռուստա-ռադիոհեռարձակման ընկերությունը, 60-ից ավելին՝ ОРТ-ն, մի քանի տասնյակը՝ НТВ, Russia Today-ը և Life News հոլդինգը: Дождь հեռուստաալիքի և Эхо Москвы ռադիոկայանի աշխատակիցներ ցանկում չկան: