Անձնազոհության մեդալով պարգևատրել վարորդներին տուգանող կազմակերպությանը. Նաիրա Զոհրաբյանը հեգնում է

Այսօր ԱԺ լսումների ժամանակ ԲՀԿ խմբակցության քարտուղար Նաիրա Զոհրաբյանը նշեց, որ «Սեքյուրիթի Դրիմ» կազմակերպությունը, փող աշխատելուց բացի, որևէ այլ ռիսկի չի գնում:

«Եթե 70 տոկոս գերշահույթը  50 տոկոսով փոխարինելը ռիսկ է, ուրեմն եկեք մեր պատվո մեդալների մասին օրենքում փոփոխություններ կատարենք և ներկայացնենք: Ստացվում է, որ  «Սեքյուրիթի Դրիմ» կազմակերպությունը զբաղվել է անձնազոհությամբ: Ուրեմն կառաջարկեմ իմ գործընկերներին` այդ ընկերությանը անձնազոհության մեդալով պարգևատրելու նախաձեռնությամբ հանդես գալ»,- հեգնեց Նաիրա Զոհրաբյանը:

Նրա խոսքով՝ չկա աշխարհում որևէ երկիր, բացի Հայաստանից, որտեղ տուգանքները երթևեկության խախտումների համար այդքան անհամաչափ լինեն ՀՀ քաղաքացու ստացած եկամուտներին, ներառյալ` միջին և նվազագույն աշխատավարձն ու միջին եկամուտը: «Մի՞թե պաշտոնական վիճակագրություն չէ` հասկանալու համար, որ չի կարող 40 000 աշխատավարձ ստացող քաղաքացու համար 80 000, 30 000 կամ 25 000 տուգանքն ընդունելի լինել: Օրինակ` եթե 30000 տուգանքը «մեծ անձնազոհության»արդյունքում դառնալու է 25 000 կամ 20 000, իհարկե, սա աչքակապություն է, այս ամենն ընդամենը «գալչկայի» համար արված լսում է» ,- ասաց պատգամավորը: