Հռոմի պապը Հիսուս Քրիստոսին խնդրել է դադարեցնել բոլոր պատերազմները

Հռոմի պապ Ֆրանցիսկոսը Սուրբ Հարության պատարագ է մատուցել Վատիկանի Սուրբ Պետրոս հրապարակում: Հանդիսավոր արարողության տարածքը զարդարված է եղել հազարավոր նարգիզներով, շուշաններով, մեխակներով, վարդակակաչներով, որոնք արդեն քառորդ դար ամեն տարի բերվում են Նիդերլանդներից: Ծաղիկները հիմնականում եղել են դեղին եւ սպիտակ` խորհրդանշելով Վատիկանի դրոշի գույները. տեղեկացնում է ՌԻԱ «Նովոստի»-ն:

Կեսօրին Ֆրանցիսկոս պապը հայտնվել է Սուրբ Պետրոս տաճարի պատշգամբում, հանդես եկել ավանդական օրհնությամբ` Urbi et Orbi («Քաղաքին եւ աշխարհին») եւ Հիսուս Քրիստոսին խնդրել «դադարեցնել բոլոր պատերազմները` մեծ եւ փոքր, հին եւ նոր»:

Ուղերձում պապն անդրադարձել է նաեւ Ուկրաինային` խնդրելով Տիրոջը «լուսավորել ու ոգեշնչել խաղաղ նախաձեռնությունները` այդ երկրում բռնությունները կանխելու նպատակով»:

Հոգեւոր հովիվն իր խոսքում անդրադարձել է նաեւ Գվինեայում, Սիերա Լեոնեում, Լիբերիայում եւ Սիրիայում տիրող հումանիտար ճգնաժամին, հույս հայտնել Պաղեստինի եւ Իսրայելի միջեւ խաղաղ բանակցությունների վերսկսման կապակցությամբ: Ֆրանցիսկոսն ուղերձը եզրափակել է` ներկաների, այդ թվում` տոնական պատարագին առցանց հետեւողների մեղքերին թողություն շնորհելով: Պատարագին մասնակցել է ավելի քան 150 հազար մարդ: