Մատաղիսի զորամասը լավ տեղ չի. Վոլոդյա Ավետիսյանի դեմ ցուցմունք տվեց զինվորի մայրը

Պահեստազորի գնդապետ, ազատամարտիկ Վոլոդյա Ավետիսյանի գործով այսօրվա դատական նիստի ժամանակ ցուցմունքներ տվեցին վկա Ալբերտ Մաթոսյանը և նրա կինը` Անժելա Պոսոսյանը:

Ըստ մեղադրական եզրակացության` Վոլոդյա Ավետիսյանը հափշտակություն կատարելու ուղղակի դիտավորությամբ Մաթևոսյանից է ցանկացել կաշառք ստանալ` բանակում վերջինիս որդու գործերը դասավորելու համար:

Մաթոսյանն այսօր դատարանին պատմեց, թե ինչպես է տեղի ունեցել դեպքը, սակայն դատախազը վկայի` դատարանում և նախաքննության ընթացքում տված ցուցմունքների մեջ տարբերություններ նկատեց և միջնորդեց հրապարակել նախաքննական ցուցմունքը: Վկան նախաքննական մարմնին հայտնել էր, որ որդին` Արթուրը, գերազանցությամբ ավարտել է Երևանի ճարտարապետաշինարարական համալսարանը և զորակոչվել բանակ` ծառայության անցնելով Մատաղիսի զորամասում: Նրա խոսքով` որդին թեև գոհ էր ծառայությունից, սակայն իրենք մտահոգված են եղել որդու ծառայության վայրի համար:

«Կինս անհանգստացած էր, անընդհատ լաց էր լինում, և մենք փորձում էինք ամեն կերպ մի ելք գտնել, որպեսզի որդիս ավելի մոտ տեղ ծառայի: Կինս համարյա մեր բոլոր բարեկամների և ծանոթների մոտ լաց էր լինում, բողոքում էր որդուս ծառայության վայրից»,- պատմեց Մաթոսյանը:

Ըստ նրա` կինն այդ թեմայով զրուցել է իր նախկին համակուրսեցի Ծովինար Եղոյանի հետ, ով նրան ասել է, որ իր մորեղբոր որդին` Վոլոդյա Ավետիսյանը, կարող է օգնել նրան` 500 դոլար գումարի դիմաց կարող է նրան նույն զորամասում որպես համակարգչային օպերատոր դասավորել: Ըստ վկայի` ինքը Վոլոդյա Ավետիսյանի հետ հանդիպել է Ազատության հրապարակում և զրուցել նրա հետ: Ավետիսյանն էլ իբր  ասել է, որ այդ գործը շատ ավելի թանկ արժե, սակայն Մաթոսյանի խաթր 500 դոլարով կանի: Վկան պատմեց, որ իր հարցին, թե հնարավո՞ր է որդուն այլ զորամաս տեղափոխել, Ավետիսյանը պատասխանել է, որ դա իր ուժերից վեր է, որ նման բան կարող է անել միայն պաշտպանության նախարարը: Վկան դատարանում նաեւ ասաց, որ չէր ցանկանում գնալ այդ հանդիպմանը:

Ավետիսյանի պաշտպան Արա Զաքարյանի հարցին, թե Վոլոդյան օպերայի թատրոնի տարածքո՞ւմ է Ձեզնից գումար պահանջել, վկան պատասխանեց. «Դե ես գիտեի այդ մասին, ըստեղ` ցուցմունքում, ո՞նց է ձևակերպած, չգիտեմ»:

Փաստաբանի այն հարցին, թե քննիչը քանի՞ անգամ է իրեն հրավիրել հարցաքննության, վկան պատասխանեց` 3` նշելով, որ դատախազն էլ է այնտեղ եղել: Ի դեպ, վկան իր ցուցմունքի ողջ ընթացքում թեև շրջվել էր ամբաստանյալ Ավետիսյանի կողմը, սակայն այդպես էլ նրա աչքերի մեջ չնայեց:

«Դու դավաճան ես հայրենիքի, որ գնացել ես` որդուդ «փրկելու»,- մատնացույց անելով վկային` բարկացած հայտարարեց դահլիճում ներկա ազատամարտիկներից մեկը:

Մյուս վկան` Մաթոսյանի կինը, նույնպես դատարանին պատմեց որդուն բանակ ճանապարհելու պատմությունը: «Ճիշտն ասած, ինձ համար դա շատ անսպասելի էր, քանի որ որդիս շատ լավ էր սովորում, կարմիր դիպլոմով էր ավարտել: Ես դեսից-դենից լսում էի, որ Մատաղիսը լավ տեղ չի: Բանակ գնալուց 6 օր հետո ամուսնուս ստիպեցի ինձ որդուս զորամաս տանել, հետո երբ տեսա վայրը, որոշեցի տեղափոխել նրան»:

Պատմելով Վոլոդյա Ավետիսյանի միջոցով որդու գործերը դասավորելու պատմությունը` նա նշեց, որ ի սկզբանե մտադրված չեն եղել նրան գումար տալ: Վկան պատմեց, որ այդ դեպքից հետո որդին զանգահարել է իրեն և հայտնել, որ այլ զորամաս են տեղափոխել, ինչից հետո իրենց տուն են եկել ռազմական ոստիկանության աշխատակիցները և հրավիրել բաժին, որտեղ ամուսինն իրեն ասել է, որ այս ամենի մեղավորը Ծովիկն է: Նա նույնպես նշեց, որ քննչական բաժնում եղել է մեղադրող դատախազը:

Ազատամարտիկի` վկային անպատվելու տեսանյութը դիտեք ստորև: