Վոլոդյա Ավետիսյանի գործը Արաբկիրի դատարանում է

Ազատամարտիկ, պահեստազորի գնդապետ Վոլոդյա Ավետիսյանի դեմ հարուցված քրեական գործի նախաքննությունն ավարտվել է: Գործը ՀՀ զինվորական դատախազությունից մեղադրական եզրակցությամբ ուղարկվել է Արաբկիր և Քանաքեռ-Զեյթուն վարչական շրջանների ընդհանուր իրավասության դատարան և մակագրվել դատավոր Լևոն Ավետիսյանին: Դատաքննության օրն առայժմ հայտնի չէ:

Ըստ մեղադրանքի`  Վոլոդյա Ավետիսյանը, հանդիսանալով պահեստազորի գնդապետ, խարդախությամբ հափշտակություն կատարելու ուղղակի դիտավորությամբ, կաշառք ստանալու պատրվակով, չարաշահելով իր՝ որպես նախկին զինվորական ծառայողի նկատմամբ Երևան քաղաքի բնակիչ Ալբերտ Ալեքսանդրի Մաթոսյանի մոտ ձևավորված վստահությունը և դիմելով խաբեության, թե զինվորական բարձրաստիճան պաշտոնատար անձանց միջոցով կարող է կարգավորել ԼՂՀ պաշտպանության բանակի թիվ 33651 զորամասում ժամկետային զինվորական ծառայության նշանակված Ալբերտ Մաթոսյանի որդի Արթուր Մաթոսյանին նույն զորամասում համակարգչային օպերատոր նշանակելու հարցը, սակայն, չունենալով նման պայմանավորվածություն, 2013թ. հուլիսի 29-ին` ժամը 14:00-ի սահմաններում, Երևան քաղաքի Թումանյան 54 հասցեում գտնվող` Ալեքսանդր Սպենդիարյանի անվան օպերայի և բալետի ազգային թատրոնի հարակից Ազատության հրապարակի տարածքում Ալբերտ Մաթոսյանից պահանջել է դրա դիմաց իրեն տրամադրել զգալի չափերի՝ 205.150 ՀՀ դրամին համարժեք 500 ԱՄՆ դոլար գումար, սակայն Ալբերտ Մաթոսյանը հրաժարվել է օգտվել Վոլոդյա Ավետիսյանի ծառայությունից, որի պատճառով վերջինս, իր կամքից անկախ հանգամանքներով, հանցագործությունն ավարտին չի կարողացել հասցնել:

Այսօր yerkir.am-ի հետ զրույցում Ավետիսյանի  պաշտպան Արա Զաքարյանը  նշեց, որ իրենք նախաքննական մարմնին մի շարք քննչական գործողություններ կատարելու և դատավորական որոշումներ կայացնելու վերաբերյալ միջնորդություններ էին ներկայացրել, որը, սակայն, քննիչը մերժել էր: Պաշտպանը հայտնեց, որ քննիչի որոշումը բողոքարկել են դատախազին և այժմ սպասում են պատասխանի:

Նշենք, որ մարտի 20-ին կլրանա Վոլոդյա Ավետիսյանի կալանքի ժամկետը: