Քննիչը չի տիրապետում իրավիճակին. Վոլոդյա Ավետիսյանի կողմնակիցները բողոքի ակցիա են անում

Չնայած սաստիկ ցրտին` ազատամարտիկ Վոլոդյա Ավետիսյանին սատարող տասնյակ ազատամարտիկներ հավաքվել են Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի մոտ: «Խաչակիրներ» ՀԿ-ի նախագահ Գագիկ Սարուխանյանը հայտարարեց, որ իրենք մինչեւ վերջ մնալու են` մինչև պարզ կդառնա իրենց ընկերոջ նկատմամբ դատարանի կայացրած որոշումը:

«Քննիչ Զախարյանը չի տիրապետում իրավիճակին: Այս 4 ամսվա ընթացքում քննիչները հանրապետությունով ընկած լրացուցիչ ապացույցներ են փնտրում գործին կցելու համար, քանի որ եթե գործն այս տեսքով մտնի դատարան, իրենք խայտառակ կլինեն»,- ասաց նա:

Այս պահին ազատամարտիկները, ՀՀ դրոշները եւ Վոլոդյա Ավետիսյանին պաշպանող գրություններով պաստառները պարզած, վանկարում են «ազատություն»:

Նշենք, որ դատական նիստը, որը պետք է ընթանա դռնփակ կարգով, դեռ չի մեկնարկել: