ՍԴ-ն մոլորեցրել է անգամ օմբուդսմենին

Պետք է կամավո՞ր վճարել կուտակային կենսաթոշակային վճարը, թե՞ այն պարտադիր է:  ՀՀ մարդու իրավունքների պաշտպան Կարեն Անդրեասյանը նույնպես այս հարցին հստակ պատասխանել չի կարող:

«Ես ինքս, լինելով իրավաբան, և մեր 40 իրավաբանները ինչ-որ իմաստով մոլորված ենք և չգիտենք, ինչպես մեկնել Սահմանադրական դատարանի որոշման եզրափակիչ մասի 6-րդ և 7-րդ կետերի աններդաշնակությունը»,- այսօր լրագրողներին ասաց ՄԻ պաշտպանը:

Նրա խոսքով` այս գլուխկոտրուկը (նկատի ունի ՍԴՈ-1142 որոշման վերջին կետերը) մեկնաբանել են ՍԴ երկու անդամներ, սակայն մինչ այժմ անհասկանալի է, թե արդյո՞ք պետք է դրանցով ուղղորդվել: 

Պաշտպանը նշեց, որ թեև ինքն անձամ մինչ այժմ չի վճարել կուտակային պարտադիր վճարը, սակայն չի կարող քաղաքացիներին հստակ ասել` վճարեք կամ մի վճարեք:  Խոստացավ, որ առաջիկա 20 օրում որոշակիորեն կհստակեցվի այս հարցը, և ինքը հայտարարությամբ հանդես կգա: