Չվճարել պարտադիր կուտակային վճարը, այն հակաիրավական է

«Կուտակային կենսաթոշակների մասին» օրենքի վիճարկվող դրույթները հակասահմանադրական և անվավեր ճանաչելու վերաբերյալ` Սահմանադրական դատարանի (ՍԴ) ՍԴՈ-1142 որոշումը իշխանության ներկայացուցիչները լիովին հակառակ կերպ են մեկնաբանում` նշելով, թե մինչև սեպտեմբերի 30-ը պետք է վճարվեն պարտադիր կուտակային վճարները: Գործատուներն ու հաշվապահները կանգնած են խնդրի առջև` պահումներ ու վճարումներ անե՞լ, թե՞ ոչ: Yerkir.am-ն այս հարցի շուրջ զրուցեց ԱԺ ՀՅԴ խմբակցության պատգամավոր Արծվիկ Մինասյանի հետ:

-Պարո'ն Մինասյան, կա այսպիսի խնդիր` Պետեկամուտների կոմիտեին  մինչև յուրաքանչյուր ամսվա 20-ը գործատուն պարտավոր է եկամտահարկի մասին էլեկտրոնային հաշվետվություն ներկայացնել, որտեղ ներկայումս մեխանիկորեն հաշվարկվում է նաև պարտադիր կուտակային վճարը:

-Պաշտոնապես հայտնում ենք, որ որևէ պահանջ կառավարության կամ այլ մարմինների կողմից այն մասին, թե քաղաքացիները պետք է վճարեն պարտադիր կուտակային վճարներ, հակասում է թե' Սահմանադրությանը, և'  ՍԴ որոշմանը: Սակայն կառավարության առանձին ներկայացուցիչների հակաիրավական մեկնաբանությունների արդյունքում դեռևս փոփոխության չի ենթարկվել էլեկտրոնային հաշվետվությունների ձևը, որը, սակայն, պետք է ապաակտիվացվեր և աշխատեր բացառապես քաղաքացիների կամեցողությամբ:

Եվ քանի որ կառավարությունը ցուցաբերում է համառություն և հակաիրավական  վարքագիծ է դրսևորում,  այսօր ԱԺ չորս քաղաքական ուժերը  որոշեցին առաջիկայում հանդես գալ օրենսդրական նախաձեռնությամբ` մինչև սեպտեմբերի 30-ը Սահմանադրությանը հակասող և անվավեր ճանաչված, բայց նաև տարժամկետված նորմերի  առանձին դրույթներ, որոնք  պահանջում են կուտակային վճարներ, պետք է կիրառվեն միայն կամավորության սկզբունքով:   

-Ե՞րբ է լինելու այդ նախաձեռնությունը:

-Առաջիկա շաբաթվա ընթացքում: Եվ քանի որ մինչև ապրիլի 28-ը  հերթական նիստեր չկան, մենք մտածում ենք հանդես գալ  արտահերթ նիստ հրավիրելու առաջարկով:

-Իսկ մինչ այդ ի՞նչ է պետք անել:

-« Դեմ եմ»-ը և մենք ակտիվորեն քաջալերում և կոչ ենք անում թե' աշխատողներին, թե' գործատուներին` չկատարել այդ վճարումները: Եվ ոչ միայն չկատարել, այլև հետ  պահանջել նախկինում իրենցից, անկախ իրենց կամքից, պահված գումարները:

Միաժամանակ, ուզում եմ շեշտել, որ որևէ ճակատագրական  բան չի լինի, եթե այդ գումարները որոշակի կարճ ժամանահատվածում պահվեն ինչ-որ մարդկանց մոտ, նաև` «Կամուրջ» հաշվի վրա: Մենք հնարավորություն ենք ունենալու վերադարձնել այդ գումարները:

Մի կարևոր հանգամանք եւս` համաձայն «Կուտակային կենսաթոշակների մասին» օրենքի` գործատուներից գանձված տուժանքների գումարները չեն գնալու պետբյուջե, այլ գնալու են աշխատակիցների անձնական հաշիվներին: Վերջնական արդյունքում, երբ գումարները կվերադարձվեն, չեն տուժելու ո'չ աշխատակիցները, ո'չ գործատուները:

Եվ, ի վերջո, «ՍԴ մասին օրենքում»  շատ հստակ է գրված, որ  որևէ տեխնիկական, կազմակերպական խոչընդոտ չի կարող պատճառաբանական հիմք հանդիսանալ անձի սեփականության իրավունքը սահմանափակելու հարցում:  Սա հատկապես շեշտված է հենց էլեկտրոնային հաշվետվությունների համար: Կառավարությունը և դրա առանձին անդամներ իրավունք չունեն մեկնաբանելու ՍԴ որոշումը, այն ենթակա է կատարման հրապարակման պահից: Դիմում եմ  ևս մեկ անգամ` դադարեցրեք հակաիրավական վարքագիծը, պաշտպանեք  քաղաքացու սեփականության իրավունքը: Իսկ դա այս դեպքում  նշանակում է արագ կերպով փոփոխել էլեկտրոնային հաշվետվությունների համակարգը, որը թույլ կտա անձից պահումներ կատարել` նրա կամքին համաձայն:

Մենք հիմա քննարկում ենք նաև զանգվածային դատական պաշտպանության համակարգ կիրառելու մեխանիզմը նույնպես: Իրացնելու ենք ընդվզող, պարտադիր վճարին դեմ եղող մեր քաղաքացիների պահանջը:

-Ինչպե՞ս կմեկնաբանեք այն, որ ՍԴ որոշումից հետո ՍԴ անդամները լրատվամիջոցներում սկսեցին մեկնաբանել իրենց իսկ կողմից ընդունված որոշումը:

-Դա ես համարում եմ թերացում, որովհետև ՍԴ անդամների կողմից չէր կարելի մեկնաբանություններ ներկայացնել` թե' «ՍԴ մասին» օրենքի, թե' Սահմաանդրության, թե' «Իրավական ակտերի մասին» օրենքի համաձայն:  Ինձ համար զարմանալի էր այն, որ ՍԴ  անդամ Ֆելիքս Թոխյանը «Արմնյուզ»-ում շատ հստակ ասաց, որ պարտադիր բաղադրիչը չի կարող գործել, իսկ հետո փոխեց իր տեսակետը:  Իրականում, պարոն Թոխյանի առաջին տեսակետն է հենց դրված որոշման հիմքում: Ե'վ դատաքննությունն էլ էր դա ցույց տալիս, և' ՍԴ որոշումն է այդ տրամաբանությամբ գրված:

Հարցազրույցը` Աստղիկ ԿԱՐԱՊԵՏՅԱՆԻ