Փաշինյանի կառավարությունը արցախցիների 12 պահանջից 11-ը թողել է անպատասխան․ արցախցի

«Ակնկալում ենք, որ փոխվարչապետն իջնի ներքև և պատասխանի արցախցիներին հուզող հարցերին»։ Այս մասին կառավարության շենքի մոտ հայտարարեց արցախցիներից մեկը։ 

Նա հայտնեց, որ պահանջագրի 12 կետերից 11-ը չեն իրականացվել, բանակցությունները փակուղում են։ Հաջորդիվ, երիտասարդը հրապարակեց Արցախցիների իրավունքների պաշտպանության խորհրդի շտապ պահանջագիրն՝ ուղղված ՀՀ կառավարությանը։

«Հիմք ընդունելով 2025թ․ մարտի  29-ին Արցախցիների իրավունքների պաշտպանության խորհրդի կողմից համապարփակ պահանջագիրը, հաշվի առնելով այս ընթացքում ՀՀ կառավարության կողմից ցուցաբերված խիստ սահմանափակ պատրաստակամությունը՝ ներառական կերպով քննարկելու և լուծում տալու պահանջագրում ներառված հարցերին, բավարարված չլինելով բնակարանային ծրագրում խոստացված մասնակի բարելավումներով, մտահոգված լինելով կառավարության վերջին որոշումների հետևանքով՝ բռնի տեղահանված արցախցիների չքավորությամբ և արտագաղթի ծավալներով՝ Խորհուրդը պահանջում է կառավարությունից՝ հետևյալ հրատապ և անմիջական միջոցները՝ անվերապահ կերպով ապահովել բնակվարձի աջակցության ծրագիրը՝ բոլոր տեղահանված արցախցիների համար, որոնք չունեն բնակարան՝ Հայաստանում՝ մինչև տվյալ ընտանիքի կարիքի պատշաճ բավարարում»,- նշեց երիտասարդը՝ ներկայացնելով պահանջագրի մյուս կետերը։