Մեր քաղաքացիների և տնտեսվարող սուբյեկտների համար օրենքը գործում է. Տիգրան Սարգսյան

Կառավարության այսօրվա նիստի մեկնարկին Տիգրան Սարգսյանն  անդրադարձավ ՍԴ-ի կողմից պարտադիր կուտակայինի որոշ դրույթներ հակասահմանադրական ճանաչելու հանգամանքին` նշելով, որ ՍԴ-ն ժամանակ տվեց կառավարությանն ու ԱԺ-ին` շտկելու այն բոլոր դրույթները, որոնք ճանաչվեցին հակասահմանադրական:

Վարչապետը հայտարարեց, որ այսօր ինքը ձևավորում է համապատասխան  աշխատանքային խումբ` այդ շտկումներն իրականացնելու համար:  «Մենք բոլոր շահագրգիռ գերատեսչությունների  հետ ԱԺ կներկայացնենք համապատասխան  օրենսդրական փաթեթ»,- նշեց վարչապետը` հավելելով, որ այդ հանձնաժողովի հիմնական գերատեսչությունները կլինեն արդարադատության, աշխատանքի և սոցիալական  հարցերի, ֆինանսների  նախարարություններն ու ԿԲ-ն: Նաև նշեց, որ բացառիկ հնարավորություն է ստեղծվել, որպեսզի նաև քաղաքացիական  հասարակությունը մասնակցի փոփոխությունների  մշակմանը և գործող համակարգի արդիականացման աշխատանքներին:

Օգտվելով այդ հնարավորությունից`  Տիգրան Սարգսյանը ևս մեկ անգամ դիմեց պարտադիր կուտակայինի  դեմ պայքարող քաղաքացիներին` նրանց երկխոսության կոչ անելով, նշելով, որ նաև նրանց համար է ստեղծվել հնարավորություն` մասնակցելու այդ գործընթացներին:

Վարչապետը նշեց, թե չափազանց կարևոր է,  որ կառավարությունը մասնագիտական գնահատական տա ստեղծված իրավիճակում, և որ ինքը հասկանում է, որ օրենքն այն տեսքով, ինչպես ընդունվել է ԱԺ կողմից, պետք է գործի մինչև սեպտեմբերի 30-ը: Նա դիմեց արդարադատության նախարարին` հարցնելով` արդյո՞ք ինքը ճիշտ է հասկացել: Հրայր  Թովմասյանն ընդգծեց, որ, այո, ճիշտ է հասկացել, այդպես նշվել է ՍԴ որոշման եզրափակիչ մասում,  որ օրենքի որոշ դրույթներ, ճիշտ է,  համարվում են  հակասահմանադրական, բայց օրենքը գործելու է մինչև սեպտեմբերի 30-ը, այսինքն` օրենքը այն տեսքով, ինչ տեսքով որ կա, պետք է շարունակի գործել` մինչև նշված ժամկետում կատարվեն համապատասխան փոփոխությունները:

Դրանից հետո Տիգրան Սարգսյանը  հայտարարեց, որ մեր քաղաքացիների և տնտեսվարող սուբյեկտների  համար օրենքը գործում է, և բոլորը պետք է ղեկավարվեն այդ գործող օրենքով, իսկ կառավարությունը դեռ ունի շտկումներ կատարելու ժամանակ: