Ֆրանսիացի փաստաբաններին չհաջողվեց պաշտպանել Վարդան Պետրոսյանին

Այսօր Կոտայքի մարզի ընդհանուր իրավասության դատարանում շարունակվեց դերասան Վարդան Պետրոսյանի դեմ հարուցված քրեական գործի քննությունը:

Այսօր դատարան էր ներկայացել Ֆրանսիայից ժամանած երկու փաստաբան, ովքեր փաստաբան Նիկոլայ Բաղդասարյանի հետ միասին դատարանում պետք է ներկայացնեն Պետրոսյանի շահերը: Նոր փաստաբանները, սակայն, վարույթն իրականացնող մարմնի կողմից լիազորված թարգմանիչ չունեին, ուստի դատավոր Վաղինակ Մկրտչյանը որոշեց` դիմել ՀՀ Դատական դեպարտամենտին` ֆրանսերենի թարգմանիչ հրավիրելու համար: Իսկ դատարան ներկայացած օժանդակ թարգմանչի օգնությամբ նրանց այս նիստին թույլ չտվեցին զբաղվել Պետրոսյանի պաշտպանությամբ: Կարելի է ասել` Ֆրանսիայից ժամանածներն այսօր դատարանում ունկնդրի կարգավիճակով էին:

Դատավորն այսօրվա նիստում ճշտեց ամբաստանյալի կենսագրական տվյալները: Վարդան Պետրոսյանը նշեց, որ ինքն ունի երկու երեխա, երկքաղաքացի է, իսկ ներկայումս ունի առողջական խնդիրներ:

Տուժողների ներկայացուցիչ Ռուբեն Բալոյանը խնդրեց հայտնել, թե ի՞նչ առողջական խնդիրներ ունի, ի պատասխան` Պետրոսյանը թվեց մի շարք հիվանդություններ: Նա նշեց, որ վիրահատված է լյարդը, չունի փայծաղ, ստացել է թոքերի սալջարդ, ողնաշարի ցավեր և գլխացավ ունի և մի շարք այլ հիվանդություններ:

Պաշտպան Նիկոլայ Բաղդասարյանն այսօր միջնորդեց դատարանին` փոխել իր պաշտպանյալի խափանման միջոցը, քանի որ, ըստ նրա, դատավորը լիազորություններ չի ունեցել անփոփոխ թողնելու ամբաստանյալի խափանման միջոցը: Նա նշեց, որ իր պաշտպանյալն ապօրինի է պահվում անազատության մեջ, և դատարանը նրան անհապաղ պետք է ազատ արձակի դատարան նիստերի դահլիճից: Սակայն դատավորը մոտ մեկ ժամ խորհրդակցական սենյակում անցկացնելուց հետո դուրս եկավ և մերժեց միջնորդությունը: