Հարգել Ղրիմի որոշումը. Ռուսաստանը թվարկել է Ուկրաինայի ճգնաժամի կարգավորման պայմանները

Ռուսաստանի ԱԳՆ-ն թվարկել է ուկրաինական ճգնաժամից դուրս գալու պայմանները. հայտնում է utro.ru-ն:

ԱԳՆ-ն նախ առաջարկել է «կոմպակտ խումբ» ձևավորել, որի կազմը ընդունելի կլինի Ուկրաինայի բոլոր քաղաքական ուժերի համար: 

Երկրորդ` Կիևում պետք է կյանքի կոչվի ընդդիմության և Յանուկովիչի միջև փետրվարի 21-ին կնքված համաձայնագիրը:

Մոսկվան  կոչ է արել  Ուկրաինայի Գերագույն ռադային` անհապաղ սահմանադրական ժողով հրավիրել` բոլոր շրջանների ներկայացուցիչների մասնակցությամբ՝ նոր սահմանադրության պատրաստման համար, համազգային հանրաքվեի դնել Ուկրաինայի նոր սահմանադրության նախագիծը, իսկ այն հավանության արժանանալուց հետո անցկացնել համազգային ընտրություններ:

Բացի այդ` Մոսկվան կոչ է արել հարգել ղրիմցիների որոշումը և ռուսաց լեզվին տալ Ուկրաինայի երկրորդ պետական լեզվի կարգավիճակ:

Ռուսաստանը համոզված է` միայն այդ կետերի կատարման դեպքում հնարավոր կլինի լուծել խնդիրը: