Ստամբուլում Ուկրաինայի և Ռուսաստանի միջև հանդիպումը չափազանց կարևոր է. Թրամփը թվարկել է ակնկալիքները

Ուկրաինայի և Ռուսաստանի միջև մայիսի 15-ին, հինգշաբթի անցկացվելիք հնարավոր հանդիպումը պետք է լավ արդյունքների հանգեցնի։ Արյունահեղությունը պետք է դադարեցվի, լրագրողների հետ զրույցի ժամանակ հայտարարել է ԱՄՆ նախագահ Դոնալդ Թրամփը։

«Ռուսաստանի և Ուկրաինայի միջև հինգշաբթի անցկացվելիք հանդիպումը չափազանց կարևոր է։ Ես պնդեցի, որ այս հանդիպումը տեղի ունենա։ Կարծում եմ՝ դրանից կարող է լավ բան դուրս գալ։ Դադարեցնել արյունահեղությունը, դա սարսափելի է, դա կոտորած է»,-նշել է ամերիկացի առաջնորդը։

Ըստ Թրամփի՝ ուկրաինացի և ռուս զինվորները միմյանց սպանում են Երկրորդ համաշխարհային պատերազմից ի վեր չտեսնված մասշտաբով։ Եվ սպանությունները շարունակվում են ամեն շաբաթ։

«Շատ մարտերում անօդաչու թռչող սարքեր են օգտագործվում։ Դա պատերազմի բոլորովին նոր ձև է։ Դա դաժան և անողոք պատերազմ է»,-հավելել է նա։