Մեր օրակարգը մենք ենք ձևավորում

Yerkir.am-ի հարցը. - Պրն Վարդանյան, երեկ  Ազատության հրապարակում Լևոն Զուրաբյանը իր ելույթում, խոսելով  խորհրդարանական չորս ընդիմադիր կուսակցությունների  (ՀԱԿ,ԲՀԿ, «Ժառանգություն», ՀՅԴ) գործունեության  մասին, ասել է, որ երկրի հիմնական քաղաքական ուժերը` ՀԱԿ-ը, ԲՀԿ-ն, Հայ Յեղափոխական Դաշնակցությունն  ու  «Ժառանգությունը», միասնական ճակատ են ստեղծել այս իշխանությունների դեմ:

«Բոլորդ ականատես եք, թե ինչպես մեզ հաջողվեց քննարկման դնել իշխանությունների գազային ավանտյուրայի հարցը, մարտի 1-ի սպանությունների խնդիրը, կատարել բազմաթիվ աղմկալի բացահայտումներ, որոնք ուղղակի բարոյալքել և կազմալուծել են իշխանական մեծամասնությանը»,- ասել է  նա` հավելելով, որ հերթի մեջ է կառավարությանն անվստահություն հայտնելու հարցը: Նա չի  բացառել, որ ինչ-որ պահի «Չորսի ձևաչափը» դնի նաև Սերժ Սարգսյանի պաշտոնանկության հարցը: Ինչպե՞ս կմեկնաբանեք  Լևոն Զուրաբյանի հայտարարությունը:  

Պատասխան. - Եկեք Լևոն Զուրաբյանին  մի կողմ թողնենք: Նույն հանրահավաքում  Լևոն Տեր-Պետրոսյանը, իր ելույթի վերջում դիմելով չակերտավոր վճռականներին, կրկնեց նախկինում ասած իր միտքը. «Պետք է մեկընդմիշտ գիտակցել, որ յուրաքանչյուր քաղաքական ուժ ինքն է որոշում իր օրակարգն ու մարտավարությունը»:

Նայեք Հայաստանի քաղաքական ուժերին: Այս հաստատումը ամենից առաջ և ամենաշատը բնութագրում է ՀՅԴ-ին: Այնպես որ` մեր օրակարգը մենք ենք որոշում: