Եվրոպական մշակույթի եւ կրթության կենտրոն` Բյուրականում

Բյուրականի Երաժշտական միջազգային ակադեմիան կգործի 2014-ի աշնանից:

Yerkir.am-ի հետ զրույցում «Երեւանյան հեռանկարներ» փառատոնի մենեջեր Սոնա Հովհաննիսյանը նշեց, որ Ակադեմիան անհրաժեշտություն է, քանի որ աշխարհի բոլոր լավագույն փառատոններն ունեն իրենց ակադեմիան:

«Շինարարական աշխատանքները մոտենում են ավարտին, կարծում եմ` մինչեւ աշուն մենք կավարտենք նաեւ ներքին հարդարումը: Ակադեմիան 400 տեղանոց դահլիճ էլ է ունենալու: Հունվարի 29-ին Բրյուսելում, երբ մասնակցում էի ԵՄ առաջատար մի քանի փառատոների Կլոր սեղանին, որոշվեց, որ Ակադեմիան Եվրոպական մշակույթի եւ կրթության կենտրոն է լինելու: Սա ուրախալի փաստ է մեզ համար, քանի որ այն նպաստավոր պայմաններ կստեղծի երիտասարդ ստեղծագործողների համար»,-ասաց Հովհաննիսյանը: