Դատախազի նամակն անպատասխան մնաց

Դեկտեմբերի 11-ին ՀՀ գլխավոր դատախազ Գևորգ Կոստանյանը նամակ էր ուղղել Մարդու իրավունքների պաշտպան Կարեն Անդրեասյանին` վերջինիս արտահերթ զեկույցի կապակցությամբ: Գլխավոր դատախազն առաջարկել էր ՄԻՊ-ին ներկայացնել զեկույցում արված եզրահանգումների հիմքում դրված առնվազն մեկ փաստ, որը կարող է քրեական գործի հարուցման համար բավարար հիմք հանդիսանալ:

Անցել է շուրջ երկու շաբաթ, սակայն պարոն Անդրեասյանը դեռևս չի արձագանքել դատախազի հայտարարությանը: Պաշտպանի դիրքորոշումը պարզելու ակնկալիքով դեռ դեկտեմբերի 11-ին էինք դիմել ՄԻՊ-ին, սակայն մեզ չէր հաջողվել պատասխան ստանալ, քանի որ Կարեն Անդրեասյանը բացակայում էր հանրապետությունից:

Իսկ այսօր, երբ նույն հարցով հերթական անգամ դիմեցինք ՄԻՊ-ին, մեզ պատասխանեցին, որ իրենք այլևս զեկույցի հետ կապված մեկնաբանություն չեն տալիս:

Փոխարենը  ՀՀ գլխավոր դատախազությունից  yerkir.am-ին հայտնեցին, որ դատախազի նամակի վերաբերյալ Կարեն Անդրեասյանից առայժմ պաշտոնական պատասխան չեն ստացել: