ՏԵՍԱՆՅՈՒԹ․ ՀՅԴ-ի առաջարկը՝ 5 վաշտ տրամադրել Շուշիի պաշտպանությանը, մնաց անպատասխան․ Ի․ Սաղաթելյան

Տեսակետով, որ մարդ չի եղել Շուշին պաշտպանելու համար, փորձում են արդարացնել իրենց դավաճանական գործունեությունը՝ ըստ Yerkir.am-ի հայտարարեց ՀՅԴ Հայաստանի ԳՄ ներկայացուցիչ Իշխան Սաղաթելյանը՝ պատասխանելով հարցին Արցախի նախագահ Արայիկ Հարությունյանի հայտարարության մասին, թե Շուշին պաշտպանելու համար մարդ չի եղել։

«Ինչ վերաբերում է նրան, որ մենք չունեինք ուժեր, կարող եմ շատ ուղիղ ասել, որ կոնկրետ նոյեմբերի 7-ին Հայ Հեղափոխական Դաշնակցությունը Ստեփանակերտում Արցախի իշխանություններին և Պաշտպանության բանակին փոխանցել է, որ մենք պատրաստ ենք 3-5 վաշտ ներգրավել Շուշիի պաշտպանության գործին։ Դաշնակցության կամավորները այդ ընթացքում տեղակայված էին Արցախի հյուսիսում՝ առաջնագծում, մենք առաջարկել էինք, որ նաև այդ կամավորական վաշտերին՝ 400-500 մարտիկ, ներգրավեն Շուշիի պաշտպանությանը։ Բայց այդ մեր առաջարկը մնացել է անպատասխան»,-մանրամասնեց Իշխան Սաղաթելյանը։

Նա նկատեց, որ Արայիկ Հարությունյանը, իր ավագ եղբորը պաշտպանելու համար, հայտարարություններ է անում, բայց իրականում ավելի ծանր վիճակի մեջ է դնում Նիկոլ Փաշինյանին։

«Եթե նա ասում է, որ մենք չունեինք ուժեր Շուշին պաշտպանելու համար, ապա ինքը պարտավոր է ասել՝ այդ ինչպե՞ս պատահեց, որ ադրբեջանական խմբերը հասան Շուշի։ Այդ ինչպե՞ս պատահեց, որ դուք 10-15 օր առաջ գիտեիք, որ գալիս են, բայց համապատասխան քայլեր չձեռնարկեցիք։ Ինքը ստիպված է լինելու պատասխանել մի շարք հարցերի»,-ասաց Իշխան Սաղաթելյանը։

Մանրամասն՝ տեսանյութում․