Սաշիկ Սարգսյանի եւ Խաչատուր Սուքիասյանի հարաբերությունները երբևէ լարված չե՞ն եղել

Մոտ մեկ տարի առաջ մամուլում տեղեկություններ տարածվեցին, թե ռեստորաններից մեկի մոտ վեճ է ծագել ՀՀ նախագահ Սերժ Սարգսյանի եղբոր` ԱԺ նախկին պատգամավոր Ալեքսանդր /Սաշիկ/ Սարգսյանի որդու` Նարեկի և գործարար Խաչատուր Սուքիասյանի եղբոր` Էդուարդի միջև: Մամուլում այն ժամանակ հրապարակված տեղեկությունների համաձայն` Ալեքսանդր Սարգսյանի որդին, շրջապատված թիկնապահներով, խանգարել է մարդկանց անդորրը և հայհոյանքներ տեղացել, այնուհետև օդ է կրակել, ապա` անհայտ պատճառով քաշքշոց է սկսվել նրա և Էդուարդ  Սուքիասյանի միջև: Լուրեր հրապարակվեցին, թե Սերժ Սարգսյանի եղբորորդու շրջապատի մարդիկ հրազեն են կիրառել, Էդուարդ Սուքիասյանն էլ ոտքից վիրավորվել է: Թեման այնքան հասունացավ, որ անգամ ԱԺ ամբիոնից հարցը բարձրացվեց: Ոստիկանությունն, իհարկե, որոշ ժամանակ անց հերքեց տեղեկությունը, բայց իշխանական որոշ շրջանակներ պնդում էին, որ, իրոք, նման միջադեպ եղել է:

Yerkir.am-ի տեղեկություններով` կողմերը, սկսած 2000-ական թվականներից, բավական նորմալ հարաբերություններ ունեն: Ավելին` միջադեպը, որը կողմերին մոտ կանգնած աղբյուրներն այսօր հերքում են, այնքան էլ թեժ չի եղել, ինչպես ներկայացրեց մամուլը: Սաշիկ Սարգսյանի և Խաչատուր Սուքիասյանի հարաբերություններն այսօր այնքան լավ են, որ Սաշիկ Սարգսյանն առանց որևէ կաշկանդվածության այցելում է Խաչատուր Սուքիասյանին պատկանող օբյեկտները:

Yerkir.am-ն, օրինակ, ականատես է եղել, թե ինչպես 10 օր առաջ` կեսօրից հետո, մի քանի գործարարների ու պատգամավորների ուղեկցությամբ, Սաշիկ Սարգսյանն այցելել է Խաչատուր Սուքիասյանի` Աբովյան փողոցում գտնվող օբյեկտներից մեկը: Նրան հրավիրել էին «մի կտոր հաց ուտելու», իսկ եթե որևէ մեկի հարկի տակ հաց ես կիսում, հետևությունը մեկն է` հարաբերությունները լարված չեն կարող լինել, իսկ նման մարդկանց համար, ամեն քայլը, իրոք, հաշվարկ է և չգրված օրենք:

Հարկ է նշել, որ այն ժամանակ նաև տեղեկություն հրապարակվեց, որ Ալեքսանդր Սարգսյանի որդին` Նարեկը, և Էդուարդ Սուքիասյանն ալկոհոլի ազդեցության տակ են եղել: Գուցե կողմերի` «ալկոհոլի ազդեցության տակ լինելու» փաստն է հետո առիթ եղել, որ ծագած վիճաբանությունը հարթվի և անցնի-գնա: