Կառավարությունն ԱԺ արտահերթ նստաշրջան է նախաձեռնում. օրակարգ

Կառավարությունն իր այսօրվա նիստում հաստատեց վաղվանից ԱԺ արտահերթ նստաշրջան գումարելու նախաձեռնությունը:

Ըստ այդ նախաձեռնության` կառավարությունը ԱԺ-ի քննարկմանը կներկայացնի Հայաստանի Հանրապետության նախագահի առարկությունները «Պետական տուրքի մասին», «Պետական տուրքի մասին», «Պետական տուրքի մասին»,  «Շահումով խաղերի և խաղատների մասին»,  «Հայաստանի Հանրապետության բյուջետային համակարգի մասին» օրենքներում փոփոխություններ կատարելու մասին Հայաստանի Հանրապետության օրենքների  նախագծերի վերաբերյալ:

Արտահերթ  նստաշրջանի օրակարգում ընդգրկված են նաեւ «Տեղական ինքնակառավարման մասին»,  «Երևան քաղաքում տեղական ինքնակառավարման մասին»,  «Հայաստանի Հանրապետության 2013 թվականի պետական բյուջեի մասին» օրենքներում փոփոխություններ և լրացումներ կատարելու մասին նախագծերը:

Սրանցից բացի, խորհրդարանը կքննարկի նաեւ «Ավտոմոբիլային տրանսպորտի մասին», «Ճանապարհային երթևեկության անվտանգության ապահովման մասին», «Տրանսպորտի մասին» , «Պետական տուրքի մասին», «Լիցենզավորման մասին», «Ավելացված արժեքի հարկի մասին» եւ «Եկամտային հարկի մասին»  օրենքներում եւ «Վարչական իրավախախտումների» ու  «Քաղաքացիական» օրենսգրքերում փոփոխություն եւ  լրացում կատարելու մասին օրենքների  նախագծերը:

Կառավարությունը ԱԺ հաստատմանն է ներկայացնելու նաեւ Հայաստանի ու Ռուսաստանի կառավարությունների միջև Հայաստանի Հանրապետություն բնական գազի, նավթամթերքների և չմշակված բնական ալմաստների առաքման ոլորտում համագործակցության, Հայաստանի Հանրապետություն բնական գազի առաքման ժամանակ գների ձևավորման կարգի վերաբերյալ եւ  «ՀայՌուսգազարդ» փակ բաժնետիրական ընկերության բաժնետոմսերի առուվաճառքի և հետագա գործունեության պայմանների մասին միջպետական համաձայնագրերը: