Վրաստանն իր աջակցությունն է հայտնում ուկրաինական ժողովրդին՝ եվրոպական ընտանիքի մաս դառնալու ճանապարհին

Վրաստանն Ուկրաինայի ժողովրդին համերաշխության կոչ է անում: Այսպես պատասխանեց Վրաստանի խորհրդարանի նախագահ Դավիթ Ուսուպաշվիլին՝ պատասխանելով Yerkir.am-ի այն հարցին, թե ինչպե՞ս կմեկնաբանի Ուկրաինայում տեղի ունեցող իրադարձությունները:

Դավիթ Ուսուպաշվիլին նշեց, որ  Վրաստանի խորհրդարանը երկու օր առաջ Ուկրաինայում տիրող իրավիճակի վերաբերյալ հայտարարություն է հրապարակել, ըստ որի` Վրաստանը իր   համերաշխությունն ու աջակցությունն է հայտնում ուկրաինական ժողովրդին:

«Մենք համերաշխության կոչ ենք անում մի ազգի, որը ցանկանում է եվրոպական ազատ  ընտանիքի մի մասը դառնալ»,- ասաց Վրաստանի խորհրդարանի նախագահը: Ուսուպաշվիլին նշեց, որ Վրաստանը կոչ է արել  Ուկրաինայի քաղաքական լիդերներին` գտնել ու կիրառել խնդրի լուծման խաղաղ ու սահմանադրական միջոցներ:

«Մենք անկեղծորեն ցանկանում ենք ուկրաինական ազգին խաղաղություն և բարգավաճում դեմոկրատական Եվրոպայի կազմում»,- ասաց Դավիթ Ուսուպաշվիլին:

Հիշեցնենք, որ Ուկրաինան նոյեմբերի 28-29-ը Վիլնյուսում կայացած Արեւելյան գործընկերության գագաթնաժողովում որեւէ փաստաթուղթ չստորագրեց` չնայած Կիևում ընթացող մասսայական բողոքի ցույցերին. քաղաքացիները հավաքվել էին Կիևի կենտրոնում ու անժամկետ բողոքի ակցիա էին անցկացնում` պահանջելով իշխանություններից ստորագրել փաստաթուղթը: