''Միլենան'' և ''Էլենան'' գրավել են Ավան-Առինջի հանրային պուրակը

«Միլենա» և «Էլենա» տաքսի ծառայություններն իրենց մեքենաները կայանում են Ավան-Առինջ թաղամասի կենտրոնում գտնվող կանաչ տարածքում և զբաղեցնում կից հրապարակը. ահազանգում է  «Մենք ենք այս քաղաքի տերը» քաղաքացիական նախաձեռնությունը:

Ըստ մամուլի տեղեկությունների` այդ ծառայությունները պատկանում են Երևանի ավագանու անդամ Արմեն Երեմյանին, որը մտերիմ է Տարոն Մարգարյանի հետ։ Այս տաքսի ծառայությունների մեքենաները նաև արտոնյալ կարգավիճակ ունեն Երիտասարդական կայարանին կից` Ավան տանող կանգառում, երբ ուշ ժամերին գրավում են ամբողջ կանգառն ու փոխարինում բացակայող հանրային տրանսպորտին։

«Միլենայի» և «Էլենայի» մեքենաները խոչընդոտում են քաղաքացիների տեղաշարժին Ավան-Առինջի փոքր հրապարակում և այնպիսի արագությամբ են սլանում, որ վտանգ են ներկայացնում հետիոտների համար։ Անցնող քաղաքացիները մշտապես ականատես են լինում անպարկեշտ գոռոցների և վիճաբանությունների ու աղմուկի։

«Երևանի հանրային պուրակներն ու հրապարակները նախատեսված են ընդհանուր օգտագործման համար և դրանք չեն կարող մասնավորեցվել և օգտագործվել՝ խանգարելով քաղաքացիների հանգիստն ու տեղաշարժը։

Պահանջում ենք անհապաղ հեռացնել «Միլենա» ծառայության կոնտեյները կանաչ տարածքից և տաքսիները չկայանել կանաչ տարածքում և հրապարակում»,- ասվում է նախաձեռնության հաղորդագրության մեջ: