Ավան Առինջի ռեստորանում թունավորվածները դուրս են գրվել հիվանդանոցից

Արդեն տեղեկացրել ենք, որ  օգոստոսի 1-ին ` ժամը 23.45-ին  Երևանի Ավան Առինջ թաղամասում՝ «Հատիսի լանջին» ռեստորանային համալիրում մի խումբ քաղաքացիների ինքնազգացողությունը վատացել է, շտապօգնության աշխատակիցները մի քանիսին հոսպիտալացրել են հիվանդանոց:

Պարզվել է, որ թունավորման նախանշաններով «Սուրբ Գրիգոր Լուսավորիչ» ԲԿ է հոսպիտալացվել 18 քաղաքացի: Ըստ բժիշկների` տուժածների առողջական վիճակը գնահատվել է միջին ծանրության:
 Նույն վայրից «Նորք» ինֆեկցիոն ԲԿ է հոսպիտալացվել 11 քաղաքացի: Ըստ բժիշկների` տուժածներից 4-ի առողջական վիճակը գնահատվել է ծանր, իսկ 7-ինը ` միջին ծանրության:

Yerkir.am-ի հետ զրույցում «Նորք» ինֆեկցիոն ԲԿ-ի տնօրեն  Արա Ասոյանն ասաց, որ իրենց բժշկական կենտրոն են տեղափոխվել 11 քաղաքացի` սննդային թունավորումով: Նա նշեց, որ հոսպիտալացվածներն արդեն դուրս են գրվել հիվանդանոցից:

«Սուրբ Գրիգոր Լուսավորիչ» ԲԿ-ից ևս մեզ տեղեկացրեցին, որ իրենց մոտ տեղափոխված քաղաքացիները դուրս են գրվել: