Յանուկովիչն ուղերձ է հղել

Ուկրաինայի նախագահ Վիկտոր Յանուկովիչը վիլնյուսյան գագաթաժողովի նախաշեմին ուղերձ է հղել ուկրաինացի ժողովրդին՝ փորձելով արդարացնել իր քայլը:

Նա նշել է, որ մոտ ժամանակներս հարցազրույց կտա և կպատասխանի ուկրաինացիներին հուզող բոլոր հարցերին: Նա ընդգծել է, որ եվրոպական չափանիշներին համապատասխանող հասարակության կառուցումը Ուկրաինայում այլընտրանք չունի:

«Իմ քաղաքականությունն այդ ճանապարհին եղել է ու կլինի հետեւողական: Մեզանից ոչ ոք չի խլի եվրոպական Ուկրաինայի մասին երազանքը»,- ասել է նա:

Յանուկովիչը, սակայն, նշում է, որ անազնիվ կվարվեր, եթե ստեղծված իրավիճակում չհոգար այն անպաշտպան մարդկանց մասին, ովքեր կարող էին ամենից շատ տուժել անցումային շրջանից: «Ես սխալ կլինեի, եթե թույլ տայի, որ մարդիկ զրկվեն աշխատավարձից, թոշակից: Ինչպես հայրը չի կարող իր ընտանիքին առանց հաց թողնել, այնպես էլ ես չեմ կարող իմ ժողովրդին ճակատագրի քմահաճույքին թողնել»,- ասել է նա: