Կազանի ավիավթարի 5 վարկածը

Հետաքննությունը Կազանում կիրակի օրը տեղի ունեցած ավիավթարի 5 վարկած է դիտարկում: Այդ մասին լրագրողներին հայտնել է ՌԴ տրանսպորտի նախարար Մաքսիմ Սոկոլովը՝ նշելով, որ ահաբեկչության վարկածը, որը երեկ շրջանառվում էր որոշ ԶԼՄ-ներում, բացառված է. հայտնում է РИА Новости-ն:

Ըստ Սոկոլովի՝ վթարի պատճառ կարող էին լինել օդաչուների անփորձությունը, ինքնաթիռի տեխնիկական անսարքությունը, անորակ վառելիքը, ցամաքային ծառայությունների աշխատանքը և եղանակային պայմանները:

Հիշեցնենք, որ կիրակի օրը վթարի էր ենթարկվել Մոսկվա-Կազան չվերթն իրականացնող Boeing 737 ինքնաթիռը: Վայրէջք կատարելու ժամանակ օդանավի թևը դիպել էր գետնին, եւ ինքնաթիռը պայթել էր: Բոլոր ուղևորները զոհվել էին: Նրանց թվում էր նաև Թաթարստանի նախագահ Ռուստամ Միննիխանովի որդին` Իրեկը: