ԱՄՆ-ը սիրաշահում է Հայաստանին

«Հրապարակ»-ի տեղեկություններով' «Հազարամյակի մարտահրավերներ» ծրագրից դուրս են մնացել ԱՊՀ բոլոր երկրները, այդ թվում եւ Ուկրաինան ու Մոլդովան, բացի Հայաստանից: Դա է եղել պատճառը, որ ՀՀ-ում ԱՄՆ դեսպան Ջ. Հեֆերնը շտապել է կառավարություն, աչքալուսանք տվել բյուջեի «տակ» գտնվողներին, թե լավ դիրքերում եք, շանսեր կան  ծրագիրը վերականգնելու' շարժվեք, մանավանդ, որ Քոչարյանին կոշտ նամակ գրած Դանիլովիչը' «Մարտահրավերների» կորպորացիայի հոգաբարձուների խորհրդի նախագահը, դեկտեմբերին փոխվելու է:

Հիշեցնենք, որ ՀՄ-ի հոգաբարձուների խորհուրդը կազմավորվում է ԱՄՆ պետական ինստիտուտների' Պետդեպի, Պենտագոնի, Սպիտակ տան ներկայացուցիչներից: Դեկտեմբերին լրանում է Դանիլովիչի պաշտոնավարման ժամկետը, եւ հատուկ հրավիրված նիստում նոր նախագահ է ընտրվելու: Առայժմ նրա անունը չի հնչեցվում: Բոլոր դեպքերում, ըստ թերթի աղբյուրների, Հեֆերնի եւ ամերիկյան կողմի նման քարտ-բլանշը զուտ տնտեսական աջակցություն չէ, այն նաեւ բարի կամքի դրսեւորում է Սարգսյան-Ալիեւ հանդիպումից եւ վիլնյուսյան գագաթնաժողովից առաջ: Ասել է թե' Ուկրաինայի անհասկանալի պահվածքի ֆոնին ամերիկյան կառավարությունն այս պահին «լայն ժեստ» է անում Հայաստանին, որի վերջնարդյունքը կերեւա դեկտեմբերին: