Վարչապետը պարզաբանեց, թե ինչ նկատի ուներ` ''նպաստների փոշիացում'' ասելով

ԱԺ անկախ պատգամավոր Խաչատուր Քոքոբելյանը կառավարությանն ուղղված հարցուպատասխանի ժամանակ հարց ուղղեց գործազուրկների նպաստների վերացման և վարչապետի կողմից արված հայտարարության վերաբերյալ, ըստ որի` փոշիացվել է գործազուրկների նպաստների 94 տոկոսը: Ըստ պատգամավորի` դա խոսում է կոռուպցիոն երևույթների մասին: «Արդյոք չպե՞տք է լինեն պատասխանատուներ»,- հետաքրքրվեց Քոքոբելյանը:

Վարչապետը նշեց, որ կառավարության ուսումնասիրությունները ցույց են տվել, որ գործազուրկների նպաստը շատերի համար եղել է լրացուցիչ եկամուտ, ահա` ինչու այդ համակարգը ճանաչվել է անարդյունավետ: Ըստ վարչապետի` նոր համակարգը որակապես տարբերվում է նախորդից, թիրախավորվում են այն սոցիալական խմբերը, որոնք ունեն օժանդակության կարիք, ոչ թե համատարած, ինչպես նախորդ համակարգն էր: Անմրցունակ սոցիալական խմբերը ստանալու են այդ նպաստները, իսկ կառավարությունն ակտիվ ծրագրերի միջոցով օժանդակելու է այդ մարդկանց աշխատանք գտնելու հարցում:

Վարչապետը նշեց, որ փոշիացման մասին հայտարարությունը  քաղաքական գնահատական էր, որի հետ իր շատ գործընկերներ համաձայն չեն, այսինքն` դա չի կարելի գնահատել որպես միջոցների փոշիացում, այլ պետք է խոսել համակարգերի տարբերությունների մասին: «Ես իմ կարծիքն էի հնչեցրել, որ աղքատության մեծ տեսակարար կշիռ ունեցող երկրում համատարած սոցիալական օժանդակություն իրականացնելը ճիշտ չէ: Խոսքը գնում է ոչ թե Քրեական օրենսգրքի խախտումների մասին, այլ քաղաքական գնահատականներ են, թե մոդելներից որն է առավել արդյունավետ»,- ասաց վարչապետը: