Հայաստան- Բուլղարիա. հայ ֆուտբոլիստների հետխաղային մեկնաբանությունները

Ֆուտբոլի Հայաստանի ազգային հավաքականը, «Աշխարհ-2014»-ի առաջնության շրջանակներում, առաջին հաղթանակը տոնեց սեփական հարկի տակ: Հայ ֆուտբոլիստները առավելության հասան Բուլղարիայի ազգային ընտրանու նկատմամբ` 2:1 հաշվով: Խաղից հետո հավաքականի տղաներից մի քանիսը պատասխանեցին լրագրողների հարցերին:

Յուրա Մովսիսյան.   «Այս հաղթանակին երկար էինք  սպասել: Երկար ժամանակ  Հայաստանում չէինք հաղթել: Մենք  հավատում էինք, որ կարող ենք հաղթել:  Կարևորն այն է, որ հաղթեցինք, կարևոր չէ, որ ես խփեցի հաղթական գնդակը:

Վերևում Աստված կա: Նա ամեն ինչ տեսնում է: Այստեղ Բուլղարացիներն իրենց պատիժը ստացան` իրենց իսկ շնորհիվ: Մեր մրցակիցներին խորհուրդ կտամ, որ մեզ հետ խաղերից առաջ քիչ խոսեն»:

Հենրիխ Մխիթարյան. «Մենք ոչ մի պրովոկացիայի չդիմեցինք, խաղացինք: Արեցինք այն, ինչ նախօրոք մեզ ասված էր:  Ոմանց կարող է թվալ, որ հեշտ հաղթանակ էր, սակայն դա այդպես չէ:Թող բուլղարացիները տեսնեն մեզ` հայերիս,  և հասկանան, որ մենք մարդ ենք, ոչ թե իրենց պես ոչ մարդկային հատկանիշներով օժտված մարդիկ:Մենք վստահ էինք, որ հաղթելու ենք: Մեր տղաների աչքերում տեսնում էի հաղթանակի ցանկության կրակը: Մեկ տարուց ավել է` Հայաստանում հաղթանակ չենք տոնել, և շատ էինք ուզում հաղթել:Շնորհակալություն եմ հայտնում  բոլոր երկրպագուներին:Այս հաղթանակը մեր ազգի հաղթանակն է: Լավ տրամադրությամբ կմեկնենք Իտալիա»:

Ռոբերտ Արզումանյան. « Բուժզննումը ցույց կտա, թե  որքան լուրջ է վնասվածքս:Կարևոր խաղ էր, կարևոր հաղթանակ: Լավ խաղացինք»:

Ռոման Բերեզովսկի. «Ասել, որ հաղթանակի մեծ մասը ինձ է պատկանում, պետք չէ: Ըստ իս`  հանդիպման  լավագույն խաղացողներն Օզբիլիսն ու Մովսիսյանն էին, քանի որ նրանք դարձան գոլի հեղինակ: Այսօր առջևի գիծը ավելի լավ էր  խաղում»: