Արտերկրից հրավիրված կատարողների անուններն անակնկալ է. Արամ Սուքիասյան

Այս տարի «Էրեբունի-Երևան-2795» տոնակատարությունը նախատեսված է անցկացնել հոկտեմբերի 11-ին և 12-ին. տեղեկացնում է քաղաքապետարանի պաշտոնական կայքը և հավելում, որ տոնակատարությունն այս տարի կունենա «Իմ սրտի ուղեկից» նշանաբանը:

«Էրեբունի-Երևան-2795» տոնակատարությունների մեկնարկը տրվելու է հոկտեմբերի 11-ին՝ Էրեբունի թանգարան-արգելոցի հարակից հրապարակում, և փողոցի երկայնքով ժողովրդական արվեստի գործերի, ազգային խաղերի, տարազի, խոհանոցի ցուցադրություն կլինի: Առաջին օրվա միջոցառումը ամփոփվելու է նույն հրապարակում՝ «Երևանում տոն է» խորագրով համերգային ծրագրով։

Տոնակատարության հիմնական միջոցառումները նախատեսված են հոկտեմբերի 12-ին՝ մայրաքաղաքի կենտրոնի փողոցներում, զբոսայգիներում և պուրակներում, շուրջ 30 բեմահարթակում:

«Գալա համերգը «Իմ սրտի ուղեկից» խորագիրն է կրելու, որն, ի դեպ, նաև «Էրեբունի-Երևան-2795»-ի նշանաբանն է։ Կհնչեն Երևանին նվիրված նոր երգեր: Բացի այդ, արտերկրից հրավիրել ենք նաև այլ կատարողների, որոնց մասին, սակայն, այսօր թույլ տվեք չասել, որպեսզի հաճելի անակնկալ լինի մեր հայրենակիցների համար: Դե իսկ համերգը կավարտվի շքեղ հրավառությամբ», - նշել է քաղաքապետի խորհրդական Արամ Սուքիասյանը։