Գինու փառատոն- 2013-ը ընդլայնել է սահմանները

Գինու փառատոն-2013-ը կմեկնարկի Վայոց ձորի մարզում հոկտեմբերի 4-ին: Այս տարի այն ընդլայնել է իր սահմանները. Ռինդ, Արենի եւ Եղեգնաձոր համայնքները կփորձեն լավագույնս ներկայանալ գինեգործների, զբոսաշրջիկների եւ գինու սիրահարներին:

Փառատոնի նպատակն է զարգացնել տվյալ համայնքներում զբոսաշրջությունը, պահպանել հայկական ավանդույթներն ու մշակույթը, նաեւ նպաստել Հայաստանի համաչափ տարածքային տնտեսական զարգացմանը. տեղեկացնում է Հայաստանի Էկոնոմիկայի նախարարությունը:

Փառատոնը նախ կանցկացվի Ռինդում, որտեղ կկազմակերպվի տնական արտադրության գինիների մրցույթ: Այստեղ խաղողի բերքահավաքի սիրահարներին հնարավորություն կընձեռվի խմբերով մեկնել այգիներ եւ իրենց ժամանցն անցկացնել յուրովի:

Արենի համայնքում կմատուցվեն գործարանային արտադրության գինիներ: Իսկ հոկտեմբերի 6-ին մարզկենտրոն Եղեգնաձորում կկայանա փառատոնի Բերքի տոն եզրափակիչ միջոցառումը: Մարզի բոլոր համայնքներն իրենց հատկացված տաղավարներում կներկայացնեն իրենց գյուղատնտեսական արտադրանքը: Ներկաները կօգտվեն տվյալ տեղանքին հատուկ ճաշատեսակներից ու բերք-բարիքից:

Միջոցառումներըը կուղեկցվեն թատերական, համերգային, պարային ծրագրերով: Փառատոնի ավարտին կկազմակերպվի հեղինակային երգերի ‹‹Եղեգ›› հանրապետական փառատոն-մրցույթը: