Կու-կլուքս-կլանը սպառնում է Օբամային

Կու-կլուքս-կլան ռասիստական կազմակերպությունը, որի գործունեությունը բազմիցս կասեցվել է ԱՄՆ-ում, պաշտոնական թույլտվություն է ստացել` Փենսիլվանիա նահանգի Գետիսբերգ քաղաքում իր կողմնակիցների հավաք անցկացնելու: Հավաքի կազմակերպիչ Ռիչարդ Պրեստոնը հայտարարել է, որ «դա լինելու է բողոքի ակցիա ընդդեմ Բարաք Օբամայի, ով զբաղեցնում է նախագահի պաշտոնը` խախտելով Սահմանադրությունը», նաեւ` ընդդեմ միգրանտների:

Նա հավելել է, որ Օբաման չի ապացուցել, որ ծնվել է ԱՄՆ-ում, հետեւաբար` չէր կարող նախագահ ընտրվել: Բացի այդ, ըստ Պրեստոնի, ԱՄՆ-ը պետք է դադարի համաշխարհային ժանդարմ լինելուց, քանի որ սեփական երկրում կարգուկանոն հաստատել չի կարողանում:

Հավաքն անցկացվելու է շաբաթ օրը: Թույլտվությունը տվել է Գետիսբերգի ազգային ռազմական այգու կառավարիչը` վկայակոչելով խոսքի եւ հավաքների ազատության իրավունքը: Սակայն այդ որոշումը բազմաթիվ դժգոհություններ է առաջացրել, եւ այդ օրը չեն բացառվում բախումներ: