Մատչելի բնակարան` պետական ծառայողներին

Կառավարության այսօրվա նիստում վարչապետ Տիգրան Սարգսյանը նշեց, որ էլիտար բնակարանների պահանջարկը նվազել է, իսկ էկոնոմ բնակարաններինը`ավելացել: Վարչապետը տեղեկացրեց, որ կառավարությունը մշակել է համալիր ծրագիր, եւ խթաններ կստեղծվեն, որպեսզի ՀՀ քաղաքացիները ձեռք բերեն բնակարաններ:

Տիգրան Սարգսյանը տեղեկացրեց, որ 2014թ.-ից պետական ծառայողների համար հասանելի կդառնան բնակարանի ձեռք բերման համար ձեւակերպվող հիպոթեքային վարկերը: Ըստ վարչապետի` այսօր հիփոթեքային վարկերի խոչընդոտը կանխավճարն է, ուստի կառավարությունը մտադիր է պետական ծառայողներին երաշխիքներ տալ, որպեսզի բանկերը նրանցից 30 տոկոս կանխավճար չպահանջեն:

Տիգրան Սարգսյանը հայտարարեց, որ առաջիկա մեկ ամսում պետք է կազմել հիփոթեքային վարկեր ձեռք բերել ցանկացող պետական ծառայողների ցուցակը:

Կառավարությունն, ըստ Տիգրան Սարգսյանի, առաջարկելու է կառուցապատողներին շինարարությունում կիրառել էկոնոմ դասի համար տեխնոլոգիաներ, որոնք էապես կնվազեցնեն ինքնարժեքը: