Հայաստանում սահմանադրական ճանապարհով իշխանափոխությունն անհնար է. Մանվել Եղիազարյան

Լրագրողների հետ հանդիպման ժամանակ ազատամարտիկ, «Արաբո» ջոկատի հրամանատար Մանվել Եղիազարյանն անդրադարձավ երկրում տիրող ծանր սոցիալ-տնտեսական վիճակին, արտագաղթին և ազատամարտիկների ծանր դրությանը, որոնցում նա մեղադրեց գործող իշխանություններին: «Այս իշխանություններից հնարավոր չէ ազատվել սահմանադրական ճանապարհով»,- համոզմունք հայտնեց նա:

Մանվել Եղիազարյանն անդրադարձավ նաև ազատարամարտիկ Վոլոդյա Ավետիսյանի ձերբակալությանը եւ կարծիք հայտնեց, որ այդպես փորձում են լռեցնել, վախեցնել իրենց իրավունքները պաշտպանող մյուս ազատամարտիկներին: «Ամեն կերպ փորձում են ցույց տալ, որ միայն իրենք են այս երկրում հարցեր լուծողը»,- ասաց նա:

Yerkir.am-ի թղթակցի հարցին, թե` արդյո՞ք ինքը տեղյակ է ՕԵԿ պատգամավոր Հովհաննես Մարգարյանի` ազատամարտիկների ավանդների փոխհատուցման մասին վերջերս արված հայտարարությանը, և արդյո՞ք դրանով գոնե մասամբ  կբավարարվեն ազատամարտիկների սոցիալական պահանջները, Մանվել Եղիազարյանը պատասխանեց, որ մի քանի կետերից բաղկացած այդ առաջարկն արել են Վոլոդյա Ավետիսյանը և մի քանի այլ ազատամարտիկներ: «Սակայն դրանով չի լուծվի ազատամարտիկների ներկայիս ծանր սոցիալական վիճակը»,- նշեց նա: