Եվրոպայում թոռնիկը կարող է տատիկի հետ էլ լինել... Ռուբեն Թովմասյան

ՀԿԿ առաջին քարտուղար Ռուբեն Թովմասյանը, բնականաբար, դեմ է Ասոցացման համաձայնագրի ստորագրմանը եւ ցանկանում է, որ նոյեմբերին Վիլնյուսում դրա նախաստորագրումը չկայանա: Նա չի ընդունում այն հիմնավորում, որ ԵՄ-ի հետ 3.5 տարի շարունակ անցկացված բանակցությունները պետք չէ ջուրը գցել:

«Ասում են` 3.5 տարի բանակցություններ են վարել Եվրոպայի հետ, բա 400 տարի է` Ռուսաստանի հետ բարեկամներ ենք եղել, սառեցումներ են եղել: Բա 400 տարին կփոխե՞ն 3.5 տարվա հետ»,- Yerkir.am-ի հետ զրույցում հայտարարեց ՀԿԿ առաջին քարտուղարը եւ հավելեց, որ ինչպես նախկինում, այնպես էլ այսօր համարում է, որ «մարդկության գլխին բոլոր արհավիրքները ստեղծվել են Եվրոպայից` Նապոլեոն, Հիտլեր...»:

Ռուբեն Թովմասյանի կարծիքով` այսօր ամենակարեւորը եւ ամենագլխավորը հայ ժողովրդի անվտանգությունն է, սահմանների պահպանումը: Այստեղ ընկեր Թովմասյանը հիշեց Իսահակյանի տողերը` «Սահմանի վրա կանգնած ռուսի մի սապոգը չեմ փոխի հազար վիլսոնների գլխի հետ»:

«Այլասերվածությունը Եվրոպայում հասավ նրան, որ մեկն ասաց` թոռնիկը կարող է տատիկի հետ էլ լինել... Այլասերվածությունն էլ ոնց է լինում: Ինչ կեղտոտ բան ասեք` Հիտլերից, Նապոլեոնից հետո կարող եք գտնել Եվրոպայում: Դա ի՞նչ ժողովրդավարություն է: Մենք ունենք ազգային հիանալի, դարավոր սովորույթներ, որը ոչ մի անգամ չարժի փոխել եվրոպական արժեքների հետ»,- ընդգծեց Թովմասյանը:

Նա թեեւ համաձայն է մեր այն դիտարկմանը, որ այսօրվա Ռուսաստանն էլ չի փայլում իր արժեքային համակարգով, բայց մեկ է` «ՌԴ-ն մեր դարավոր բարեկամն է»:

ՀԿԿ առաջին քարտուղարը վստահ է, որ Մաքսային միությանն անդամակցելը մեր ինքնիշխանությանը չի կարող վնասել, «եթե մենք ինքներս ներսում չվնասենք մեր ինքնիշխանությանը»: