Միջազգային մրցույթում հաղթած բլոգերները գալիս են Հայաստան

Հայաստանի ազգային մրցունակության հիմնադրամը սույն թվականի սեպտեմբերի 8-14-ը Հայաստանում կհյուրընկալի «Մետաքսե ճանապարհի մարտահրավեր» բլոգերների միջազգային մրցույթի հաղթողներին. հայտնում է հիմնադրամի լրատվական բաժինը:

Հայաստանն, ի դեմս Հայաստանի ազգային մրցունակության հիմնադրամի, ՄԱԿ-ի Զբոսաշրջային համաշխարհային կազմակերպության (UNWTO) կողմից կազմակերպված մրցույթի գլխավոր հովանավորն է:

Ըստ այդմ՝ ՀԱՄՀ-ն հնարավորություն է ընձեռել միջազգային ժյուրիի որոշմամբ հաղթած 2 բլոգերներին՝ Ջոնաթան Փաուելին և Նայլահ Հայուարդին, այցելելու Հայաստանի տեսարժան վայրերը և ծանոթանալու բազմաբնույթ զբոսաշրջային արդյունքներին, մասնավորապես պատմամշակութային հարուստ ժառանգությանը և հոգևոր արժեքներին, ինչպես նաև ժամանակակից կյանքին:

Փորձի փոխանակման և երկկողմ կապերի հատատման նպատակով այցի շրջանակներում կկազմակերպվի նաև հանդիպում հայաստանյան բլոգերների հետ:

Հայաստանում իրենց տպավորություններն ու բացահայտումները բլոգերները կարտացոլեն իրենց բլոգներում՝ բարձրացնելով Հայաստանի ճանաչելիության մակարդակը միջազգային բլոգոլորտի, ինչպես նաև հասարակության լայն շրջանակներում: