Շվեյկն էլ էր զինվոր, այն էլ` քաջարի...

Հարություն Հարությունյանը ֆեյսբուքյան իր էջում գրում է.

Ահավոր տգեղ է (մեղմ ասած) երբ մարդը բանակում չի ծառայել, վառոդի հոտ չի զգացել, բայց առիթը չի կորցնում և հատկապես խաղաղ պայմաններում զինվորական հագուստով նկարվում է և սոցցանցերում տարածում: Չգիտես ինչո՞ւ, որոշ մարդկանց մոտ ընդունված է, երբ Արցախ կամ սահմանամերձ գյուղ են գնում, անպայման դաշտային զինվորական համազգեստ պետք է հագնեն և «պատկեր մը քաշվեն»:

Դե մտածում են ` պատմության համար է, չիմացողները կմտածեն` մեր Ռեմբոն է: Տղերք, մարդ եղեք, գոնե այդ համազգեստի պատվի հետ մի խաղացեք, թե չէ ստիպված հավաքելու եմ ձեր նկարները, պահեմ և հենց , Աստված մի արասցե, կռիվ լինի ու դուք «մկան ծակում» թաքնվեք, այնժամ, իրար հետ լուրջ խոսելու թեմա կունենանք: Թե Արցախ և թե սահմանամերձ գյուղեր ուղղակի այցելեք քաղաքացիական հագուստով, ինչպես այնտեղ շրջում են, ապրում են հասարակ քաղաքացիները: Գոնե այս դեպքում փորձեք մնալ հավասարի կարգավիճակում, թե չէ Շվեյկն էլ էր զինվոր, այն էլ` քաջարի...