Թուրքիայի օմբուդսմենը պահանջում է չեղյալ համարել հիջաբն արգելող որոշումը

Թուրքիայի մարդու իրավունքների եւ ազատությունների պաշտպանության պետական մարմինը երկրի կառավարությունից պահանջում է պետական մակարդակով թույլատրել հիջաբ կրելը. տեղեկացնում է SalamNews-ը: Օմբուդսմեն Նիհաթ Օմերօղլուն պաշտոնական դիմում է հղել վարչապետ Էրդողանին` խնդրելով չեղյալ համարել Աշխարհիկ հագուստի կանոնակարգը, նաեւ վերականգնել հիջաբ կրելու համար աշխատանքից ազատված կանանց` աշխատելու իրավունքը: Նամակը կառավարության կողմից անտեսվելու դեպքում օմբուդսմենը սպառնում է դիմել Մարդու իրավունքների եվրոպական դատարան:

«Որոշումը կախված չէ անձամբ վարչապետից կամ ինչ-որ մեկից: Վեճի լուծման համար, բացի կառավարության ղեկավարից, անհրաժեշտ է ներքին գործերի նախարարության, արդարադատության նախարարության, նաեւ խորհրդարանի մասնակցությունը»,- իրադրությունը մեկնաբանել է խորհրդարանի մարդու իրավունքների հարցերով հանձնաժողովի նախկին ղեկավար Մեհմետ Էլքաթմըշը: