ՀՀԿ-ական ուսանողները բողոքում են նուրբ մեթոդներով

«Երիտասարդ համալսարանականների միավորում» հասարակական կազմակերպությունը երկուշաբթի օրն առավելագույնը 50 հոգանոց ակցիա է կազմակերպելու Երևանի քաղաքապետարանի առջև տրանսպորտի ուղեվարձի բարձրացման դեմ: Ակցիայի մասնակիցները պահանջելու են ուսանողների համար տրանսպորտի սակագինը սահմանել 100 դրամ: Նրանք, սակայն, չեն պատրաստվում դիմել կոշտ մեթոդների, այլ համապատասխան առաջարկություններով նամակ են հանձնելու քաղաքապետարանի տրանսպորտի վարչություն, ինչպես նաև տրանսպորտի և կապի նախարարություն:

Այս նպատակով օրեր առաջ Facebook սոցիալական կայքում ստեղծված «Ուսանողներին սպասարկել 100 դրամով» խումբն արդեն հավանել է 826 մարդ:

«Երիտասարդ  համալսարանականների միավորում» ՀԿ-ի փոխնախագահ Զոհրապ Հովհաննիսյանի խոսքով`  բացի ուսանողներից, իրենց են միացել խնդրով շահագրգիռ այլ  քաղաքացիներ:

«Թանկացումից հետո ուսանողները, իրենց սոցիալական պայմաններից ելնելով, մտադիր են անգամ կիսատ թողնել ուսումը և աշխատել»,- լրագրողների հետ հանդիպման ժամանակ հայտարարեց նա և հավելեց, որ թանկացումը ծանր կանդրադառնա հատկապես մարզերից եկող, ինչպես նաև ջավախահայ ուսանողների վրա:

Yerkir.am-ի  հարցին` միայն ուսանողների համա՞ր են առաջարկելու անփոփոխ թողնել գինը, Հովհաննիսյանը պատասխանեց. «Մեր  կազմակերպությունն այսօր զբաղվում է միայն ուսանողության խնդիրներով, և մեր խնդիրն ուսանողների շահերի պաշտպանությունն է: Ես,  բնականաբար, շատ ուրախ կլինեի, որ երթուղայինների թանկացման խնդիր չլիներ»:

Yerkir.am-ը  ՀԿ-ի ՀՀԿ-ական փոխնախագահից հետաքրքրվեց` արդյո՞ք հնարավոր չէր նախքան ակցիա կազմակերպելն այս հարցը համաձայնեցնել կուսակցության ներսում:

«Ես ներկայացնում եմ ուսանողությանը, ես չեմ ներկայացնում Հանրապետական կուսակցությանը: Դա իմ անձնական խնդիրն է եղել երբ, որ ցանկացել եմ դառնալ հանրապետական, դա ընդհանրապես կապ չունի այսօրվա իմ նախաձեռնության հետ: Ուսանողությունը երկուշաբթի օրը դիմելու է քաղաքապետին»,- պատասխանեց Հովհաննիսյանը:

Ի դեպ, «Երիտասարդ  համալսարանականների միավորում ՀԿ-ի նախագահը ՀՀԿ-ական Գևորգ Մելքոնյանն է, ով ուսանողությանն առավել հայտնի է նախագահական ընտրություններից հետո կազմակերպված դասադուլներից: