Մեր ինչի՞ն էր պետք այս օրենքը. ՀՀԿ-ական կին պատգամավորները նույնպես բողոքում են կառավարության օրենսդրական նախաձեռնության դեմ

Այսօր ԱԺ-ում անցկացվում են խորհրդարանական լսումներ կառավարության ներկայացրած «Ժամանակավոր անաշխատունակության մասին» և «Նպաստների մասին» օրենքներում փոփոխություններ և լրացումներ կատարելու վերաբերյալ օրենքի նախագծի մասին:

ԱԺ ՀՀԿ խմբակցության պատգամավոր Ռուզաննա Մուրադյանը հարց ուղղեց ՀՀ սոցիալական հարցերի նախարար Արտեմ Ասատրյանին, թե` «մեր ինչի՞ն էր պետք այս օրենքը»: «Դրանից լավ հարց չկա»,- ակնարկեց ԱԺ սոցիալական հացերի հանձնաժողովի նախագահ Հակոբ Հակոբյանը:

Հարցին պատասխանեց նախարար Արտեմ Ասատրյանը: Ըստ նրա` հիմնաական խնդիրը նպաստների ծրագրերի արդյունավետությունն էր և դրա հետ կապված ծախսարդյունավետության խնդիրը: Նախարարը մեջբերեց ոլորտի հետ կապված Վերահսկիչ պալատի ուսունասիրությունները, համաձայն որոնց` որոշ ծրագրեր արդյունավետության տեսանկյունից սկսել են իրենց նպատակից շեղվել:

«Եթե ծախսարդյունավետության խնդիրներ կային, ուրեմն պետք է անդրադառնայինք այդ խնդիրներին, իսկ ԱԺ լսումները միտված են միայն այդ խնդիրների լուծմանը, և հուսով ենք, որ քննարկման արդյունքում այս խնդիրների օպտիմալ լուծումներ կառաջարկվեն, հակառակ դեպքում` մեծ պրոբլեմներ կլինեն ծախսերի ավելացման առումով»,- նշեց նախարարը:

ԱԺ ՀՀԿ խմբակցության մեկ այլ կին պատգամավոր` Կարինե Աճեմյանը, նշեց. «Եկեք` այնպես անենք, որ կանանց իրավունքները չոտնահարվեն»: Արտեմ Ասատրյանը արձագանքեց, թե պետք է անել ամեն ինչ, որ այդ իրավունքները չոտնահարվեն:

ԱԺ ԲՀԿ խմբակցության պատգամավոր Էլինար Վարդանյանն էլ անընդունելի համարեց աշխատող մայրերի վրա բեռի ավելացումը: