Ռուս-հայկական հարաբերություններում սեպ խրող ՀԿ-ների դեմ նոր մեթոդներով պետք է աշխատել. ՀՀ-ում ՌԴ դեսպան

Հայաստանում Ռուսաստանի դեսպան Իվան Վոլինկինը հարցազրույց է տվել հայկական Ноев Ковчег ռուսալեզու պարբերականին, որում մի շարք թեմաների հետ մեկտեղ անդրադարձել  է նաև Հայաստանում գործող  հասարակական կազմակերպություններին, որոնք եվրոպական արժեքներ են քարոզում:

Հարցին՝ չի՞ կարծում, արդյոք, որ Ռուսաստանը պետք է աշխատի նման՝ ռուս-հայկական հարաբերություններում սեպ խրող կազմակերպություններին պատասխան հարված տալու ուղղությամբ, նա, մասնավորապես, ասել է. «Վստահ եմ, որ Ռուսաստանը պետք է ավելի ակտիվորեն հայտարարի Հայաստանի տեղեկատվական դաշտում իր ներկայության մասին: Այս հարցում  կասկած չկա: Սակայն Հայաստանում գործող այն հասարակական կազմակերպությունների չեզոքացման ուղղությամբ, որոնք ցանկանում են սեպ խրել ռուս-հայկական հարաբերություններում, հավանաբար, պետք է աշխատել նաև այլ մեթոդներով: Ռուսաստանում, օրինակ, ՀԿ-ների գործունեությունը  հստակ կարգավորող օրենք է ընդունվել: Ի վերջո, ակնհայտ է, որ նրանք, ովքեր իրենց գործունեությունն ուղղում են ռուս-հայկական բարեկամության դեմ, ո'չ Ռուսաստանի, ո'չ էլ Հայաստանի բարին չեն ցանկանում»:

Դեսպանը նաև նշել է, որ այս առումով պետք է ուժեղացնել նաև տեղեկատվական քարոզչությունը: «Ռուսները պետք է իրազեկ լինեն Հայաստանում կատարվող իրադարձություններին, հայերը՝ այն ամենին, ինչ կատարվում է Ռուսաստանում»,- նշել է նա: