Հենց այսպես է փտում ծիրանը

Yerkir.am-ի թղթակիցը Արմավիրի մարզի ծիրանի այգիներում հանդիպել է բազմաթիվ գյուղացիների, ովքեր հուսահատ վիճակում են. բերքի ծանրությունից ծառերը ճյուղաթափ են լինում, իսկ բերքը` տոննաներով, փտում է ծառերի տակ:

Մինչդեռ վերջերս գյուղնախարար Սերգո Կարապետյանը հայտարարեց, թե ծիրանի մթերման հետ կապված խնդիրները լուծված են. «Ծիրանի մթերման գործընթացը մեկուկես ամիս դեռ կշարունակվի: Հուսով ենք, որ անցած տարվա տվյալները կգերազանցենք»,- վստահեցրեց նա:

Գյուղնախարարը մեկ անգամ չէ, որ խոստացել է՝ այս տարի խնդիր չի լինելու, գյուղացու` ոչ մի կիլոգրամ բերք չի մնալու ծառի տակ: Իսկ թե ինչպես են լուծվել մթերման խնդիրները, դիտեք տեսանյութում:

Հունիսի 24-ին Արմավիրի մարզի որոշ գյուղերի բնակիչներ փակել էին Արմավիր-Գյումրի միջպետական ճանապարհը՝ դժգոհելով, որ ծիրան մթերող ընկերությունները արհեստականորեն իջեցրել են գինը՝ հասցնելով 150-200 դրամի՝ խոստացված 400-500 դրամի փոխարեն: Նրանք պահանջում էին հանդիպում գյուղնախարարի հետ: Նախարարի փոխարեն եկավ Արմավիրի մարզպետ Աշոտ Ղահրամանյանը ու հայտարարեց. «Դրուժբեքը առեք, ձեր ծառերը կտրեք, որ ճանապարներն էլ չփակեք, գաք ստեղ կանգնեք»:

Yerkir.am-ի տեսախցիկը նկարել է գյուղացիների, ովքեր պատրաստվում են հենց այդպես էլ վարվել: