″Ոսկե ծիրանը″ կհյուրընկալվի Գյումրիում

Արդեն երրորդ տարին է, ինչ «Ոսկե ծիրան» կինոփառատոնի շրջանակներում ներկայացվում է «ԱՊՀ երկրների կինո» ծրագիրը: Այս տարի ծրագիրը կանցկացվի Գյումրիում` «Գյումրին ԱՊՀ մշակութային մայրաքաղաք» ծրագրի շրջանակներում:

Ծրագրի ղեկավար Անահիտ Ղազարյանը լրագրողների հետ զրույցում նշեց, որ ծրագրում ընդգրկված է 16 ֆիլմ, որոնցից 2-ը` վավերագրական, 8-ը` խաղարկային, 6-ը` կարճամետրաժ:

«Այս տարի առաջին անգամ ծրագրում ընդգրկվել են նաեւ երկու հայկական ֆիլմեր. Մենք` որպես տանտերեր, հայկական ֆիլմերը բաց էինք թողնում, բայց քանի որ ծրագիրը ցուցադրվելու է Գյումրիում, որոշեցինք, որ հայկական ֆիլմերն էլ պետք է ներկայացնենք գյումրեցիների համար: Ծրագրի մեկնարկը կտրվի հուլիսի 9-ին` Գյումրու «Հոկտեմբեր» կինոթատրոնում»,- ասաց Ղազարյանը:

Ըստ նրա` ծրագրի շրջանակներում կցուցադրվեն ուկրաինական, ռուսական, բելառուսական, ղազախական ֆիլմեր:

Ղազարյանի տեղեկացմամբ` կցուցադրվի նաեւ «Միմինո» ֆիլմը, քանի որ այս տարի լրանում է ֆիլմի` էկրան բարձրանալու 35-րդ տարին, ինչի առթիվ Հայաստան կժամանի ֆիլմի ռեժիսոր Գեորգի Դանիելիայի կինը` Գալինա Դանիելիան: Նա նշեց նաեւ, որ ծրագրի շրջանակներում Գյումրի կայցելեն մի շարք օտարերկրացի կինոռեժիսորներ եւ դերասաններ: