Քրդական համայնքի ''հմայքը''

Արագածոտնի մարզի  Ռյա Թազա քրդական գյուղի մոտակայքում մոտ  մեկ շաբաթ առաջ տեղի ունեցած վթարը խլեց 3 մարդու կյանք, իսկ 10 հոգի տարբեր աստիճանի մարմնական վնասվածքներով տեղափոխվեց հիվանդանոց:

Ցավոք, այս վթարը գյուղի ճանապարհին տեղի ունեցած վթարներից միակը չէ: Ռյա Թազայում, հատկապես` վերջին տարիներին, ավտովթարի զոհ են դարձել տասնյակ բնակիչներ, հիմնականում`  երեխաներ: Գյուղի մյուս ծայրամասում գտնվող դպրոց հասնելու համար երեխաները ստիպված ամեն օր կտրում-անցնում են  գյուղի միջով անցնող Երևան-Սպիտակ մայրուղին: Այստեղ թույլատրելի արագությունը 50-60 կմ/ժ. է, սակայն մեքենաները շատ հաճախ սլանում են  100-120 կմ/ժ. արագությամբ, ինչն էլ վթարների պատճառ է դառնում: Գյուղացիները բազմիցս ահազանգել են  ճանապարհին թմբիկներ կառուցելու անհրաժեշտության մասին, սակայն անգամ վերջին խոշոր վթարից հետո պատկան մարմինները ոչինչ չեն ձեռնարկել:

Սակայն  սա միակ խնդիրը  չէ, որ մտահոգում է գյուղացիներին: Բազմաթիվ չլուծված խնդիրների թվում են գյուղամիջյան ճանապարհների, խմելու, ոռոգման ջրի ջրագծերի վերանորոգումը և այլն:

Գյուղն ունի 115 տնտեսություն: Ապրուստի հիմնական միջոցը գյուղատնտեսությունն ու անասնապահությունն են: Վերջին  տարիներին միակ բանը, որ կառուցվել է գյուղում, երկհարկանի դպրոցն է ( մոտ 12 տարի առաջ է կառուցվել): Գյուղի անմխիթար վիճակի և բազմաթիվ խնդիրների մասին է խոսում նաև  գյուղի` դարն ապրած, կրպակ հիշեցնող համայնքապետարանը: Այն իր ողջ «հմայքով» ներկայացված  է տեսանյութում: