Կենտրոնական բանկը նոր` արծաթե հուշադրամ է թողարկել

Հայաստանի Հանրապետության Կենտրոնական բանկը թողարկել է ՀՀ ազգային դրամի 20 տարուն նվիրված` «Ազգային դրամի 20 տարին» հուշադրամ:

Ինչպես տեղեկացնում է ԿԲ հասարակայնության հետ կապերի ծառայությունը, հուշադրամի դիմերեսին ՀՀ զինանշանն է և դրամի 20-ամյակի տարբերանշանը: ՀՀ զինանշանի ֆոնին ՀՀ թղթադրամների պաշտպանական հատկանիշները (գիլյոշ և պաշտպանական ներգիծ) նմանացնող պատկերներ են:

Դրամի 20-ամյակի տարբերանշանից ձախ թողարկման տարեթիվն է` «2013», շրջագծով` «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» և «REPUBLIC OF ARMENIA» մակագրությունները: Հուշադրամի դարձերեսին ՀՀ կենտրոնական բանկի շենքն է և ՀՀ թղթադրամների պաշտպանական հատկանիշները (գիլյոշ և թափանցիկ պատկեր) նմանացնող պատկերներ են, շրջագծով` «ԱԶԳԱՅԻՆ ԴՐԱՄԻ 20 ՏԱՐԻՆ» և «20 YEARS OF NATIONAL CURRENCY» մակագրությունները:

Հուշադրամի բնութագիրն է` անվանական արժեքը`1000 դրամ, մետաղը և հարգը արծաթ` 9990 հարգի, քաշը`31,1 գ, տրամագիծը` 38,0 մմ, դրամաշուրթը` հարթ, համարակալված, տպաքանակը` 500 հատ:

Հուշադրամի էսքիզների հեղինակն է Վարդան Վարդանյանը: Հուշադրամը հատվել է Նիդերլանդների արքայական դրամահատարանում: