Ըմբշամարտի պատանեկան առաջնությունից մեծ ակնկալիքներ ունենք. Ժիրայր Հովհաննիսյան

Մոտնենեգրոյի Բար քաղաքում հունիսի  17-21-ը կանցկացվի ըմբշամարտի` Եվրոպայի պատանեկան առաջնությունը: Մրցումներին ընդառաջ yerkir.am-ը զրուցել է ըմբշամարտի Հայաստանի պատանեկան հավաքականի մարզիչ Ժիրայր Հովհաննիսյանի հետ:

- Ժիրա'յր, ինչպե՞ս եք գնահատում հավաքականի ընդհանուր վիճակը:

- Շատ լավ: Փառք Աստծո, կորուստներ չունենք, լուրջ վնասվածքներ` նույնպես: Տղաներն անցել են 3 ուսումնամարզական հավաք, այժմ վերջին փուլում են և լավ մարզավիճակում:

- Ըմբշամարտի կանոնները բոլորովին վերջերս են ենթարկվել փոփոխությունների: Պատանի ըմբիշները բավարար ժամանակ ունեցա՞ն հարմարվելու նոր կանոններին:

- Մենք ուշ տեղեկացանք փոփոխությունների  միասին, սակայն չեմ կարծում, որ տղաների վրա դա հոգեբանորեն մեծ ազդեցություն կունենա: Տեղեկանալուն պես սկսեցինք պարապել նոր կանոններով: Այն ըմբիշները, ովքեր ունեն հաստատուն տեխնիկա, նրանց համար նոր կանոններով գոտեմարտելը բարդ չի լինի:

- Իսկ Դուք ինչպե՞ս եք վերաբերվում կանոնների փոփոխությանը:

- Դրական եմ գնահատում: Այժմ այնպիսի կանոններ են գործում, որոնք դիտարժան են դարձնում ըմբշամարտը: Մարզիկներն ավելի ակտիվ կլինեն գորգում և չեն սպասի վիճակահանությանը կամ չգիտես` ինչի:

- Ի՞նչ ակնկալիքներով եք մեկնում Եվրոպայի առաջնությանը:

- Եվրոպայի առաջնությունից մեծ ակնկալիքներ ունենք: Խոստումներ չեմ ցանկանում տալ, սակայն ունենք այնպիսի ըմբիշներ, ովքեր կարող են մեզ ուրախացնել տարբեր գույնի մեդալներով:

- Ոսկե մեդալ ո՞ւմից եք ակնկալում:

- Սպասելիքներ բոլորից ունենք, իհարկե, սակայն կցանկանայի առանձնացնել 85 կգ քաշային կարգում հանդես եկող Ռազմիկ Պողոսյանին (Վանաձոր), ով Եվրոպայի անցած տարվա բրոնզե մեդալակիրն է: 

Հարցազրույցը` Շուշանիկ Հակոբյանի