Ո՞վ էր գրել գյուղնախարարի ելույթը

Ի պատասխան ՀՅԴ-ական Աղվան Վարդանյանի հարցին, գյուղնախարար Սերգո Կարապետյանը վաղօրոք պատրաստած տեքստ էր ԱԺ-ում կարդացել, որտեղ ընդդիմությանը մեղադրել էր «կարկուտը» շահարկելու մեջ, թեև հարցը կարկուտին չէր վերաբերում:

Վարդանյանն իր զարմանքն էր հայտնել հարցի հետ կապ չունեցող պատասխանի վերաբերյալ և կոչ արել նախարարին վերադառնալ նախարարություն ու աշխատանքից ազատել այդ տեքստը գրողին:

«Հրապարակ»-ը տեղեկացել է, որ տեքստն իրականում գրվել է ոչ թե գյուղնախարարությունում, այլ նախագահականում, որտեղ փորձել են կանխատեսել ընդդիմության «շահարկումները» և նախարարին զինել «հզոր» պատասխանով:

Ասում են՝ Կարապետյանը փորձել է նախապես կազմակերպել, որ ընդդիմությունը կարկուտի մասին հարց հնչեցնի, հանրապետականները հանգստացրել են՝ անպայման մեկնումեկը կտա: Եվ երբ նա լսել է, որ ընդդիմությունն իրեն հարց է ուղղում, այնքան է ոգևորվել, որ անգամ չի լսել հարցը. նախագահականի հույսերն արդարացնելն այս պարագայում ավելի կարևոր էր: